«Մարցում երրորդ հէկ-ի կառուցման հետեւանքով գետն ընդհանրապես կցամաքի, որը կունենա իր բացասական մի շարք հետեւանքները`բուսականության վերացում, սողանքների ի հայտ գալ»,- այդ մասին այսօր թեմայի վերաբերյալ հրավիրված մամուլի ասուլիսի ժամանակ ասաց ակտիվիստ Հովհաննես Ղազարյանը` նկատելով, որ բացի վերոնշյալները` երրորդ հէկ-ի կառուցման արդյունքում գյուղացիները կզրկվեն գետի ջուրը օգտագործելու, անասուններին ջրելու եւ այլ հնարավորություններից:
«Ժամանակին այդտեղ նաեւ ձուկ է եղել, այժմ, ցավոք, ձուկ էլ չկա»,-ասում է նա:
Ակտիվիստի դիտարկմամբ՝ անտրամաբանական է այն, որ ինչ-ինչ բիզնես նպատակների համար գետը մտցնեն խողովակները`ոչնչացնելով բնությունը` այն դեպքում, երբ հանրային լսման արձանագրությունը խախտումներով է կազմվել:
Կարդացեք նաև
«Նմանատիպ գործընթացները պետք է ունենան որոշակի ընթացակարգեր, որոնք պետք է պահպանվեն: Այս դեպքում թիվ մեկ շահառուն Մարց գյուղի բնակիչն է: Մարտի 12-ին Մարցում տեղի են ունեցել հանրային լսումներ, մեր ձեռքի տակ կան այդ լսումների տեսանկարահանումները, որտեղ հստակ երեւում է բնակիչների դիրքորոշումը: Կազմվել է անօրինական արձանագրություն, հանրային լսումը կեղծվել է, քանի որ 7 մարդու համաձայնության ստորագրություն կա, բայց իրականում 25 մարդ է մասնակցել: Մյուսների դիրքորոշումը ինչու չի արտացոլված: Ընդհանուր առմամբ 400 չափահաս բնակիչ ունեցող գյուղի 320 բնակիչը ստորագրությամբ դեմ է արտահայտվել այդ հէկ-ի կառուցմանը»,-ասում է Հովհաննես Ղազարյանը:
Նա պատմում է, որ վերջերս տեղեկացել են այն մասին, որ Մարցում վախի մթնոլորտ կա, որոշել են գնալ, տեղում ծանոթանալ իրավիճակին:
Արդյունքում ակտիվիստներն ու Մարց գյուղի բնակիչները Վանաձոր-Մարց հատվածում նոյեմբերի 17-ին փակել էին Վրաստան տանող միջպետական ճանապարհը` այդկերպ պատկան մարմինների ուշադրությունը հրավիրելով հարցի կարեւորության վրա` պահանջելով կասեցնել երրորդ հէկ-ի կառուցումը:
«Մի շարք պատկան մարմիններ պետք է հասկական, որ եթե չեն ուզում բնակիչների զայրույթը առաջ բերել, ապա պետք է ուղղակի քայլեր կատարեն: Եթե ողջամիտ ժամկետներում խնդիրը չլուծվի, մենք նորից գնալու ենք, նորից քայլեր ենք կատարելու, հնարավոր է անժամկետ փակվի ճանապարհը, ու ոչ մեկ տեղ, ընդ որում խոսքը միջպետական ճանապարհների մասին է, մենք խաղ չենք անում: Կլինեն նաեւ այլ գործողություններ»,-եզրափակում ակտիվիստը:
Անուշ ԲՈՒԼՂԱԴԱՐՅԱՆ
