Նոյեմբերի 24-ին մեկնարկեց «Salvador Fest 2013» մտքի փառատոնը։ Արդեն ամենամյա դարձած այս միջոցառմանը մասնակցում են բուհերի մարքեթինգային և հարակից ամբիոնների ուսանողներ, երիտասարդ մասնագետներ: Փառատոնի նպատակն է բացահայտել ստեղծարար և ինքնատիպ մտքեր ունեցող երիտասարդներին, նրանց տալ իրենց մտքերն իրականություն դարձնելու հնարավորություն։
Մարքեթինգի հայկական ակումբի ղեկավար Տարոն Պարսամյանը մասնակցելու հայտ ներկայացրած երիտասարդներին տեղեկացրեց մտքի փառատոնի կանոններին։ Ըստ նրա՝ մասնակիցները կարող են իրենց ուժերը փորձել և նոր մտքեր առաջարկել մարքեթինգի այլընտրանքային ուսուցման ծրագրերի ոլորտում: Պետք է ներկայացնել նոր ծրագիր, որը կնպաստի երիտասարդ մարքեթոլոգների մասնագիտական առաջընթացին, հնարավորություն կտա նրանց տեսանելի լինել գործատուների շրջանում: Ներկայացվելիք ծրագիրը կարող է լինել կոնֆերանսի, մասնագիտական խաղի, վարպետության դասերի շարքի կամ այլ՝ բոլորովին նոր ձևաչափով: Լավագույն ծրագիր ներկայացրած երիտասարդը կստանա 100000 դրամ գումարային պարգև, բացի այդ, կլինեն այլ անակնկալներ տարբեր ֆիրմաների կողմից:
Մասնակցության ցանկություն հայտնած երիտասարդներն ունեն ընդամենը երկու շաբաթ՝ իրենց ստեղծարար գաղափարներն իմի բերելու համար։ Դեկտեմբերի 7-ին տեղի կունենա «Salvador Fest»-ի երկրորդ փուլը, որի ընթացքում պրոֆեսիոնալ ժյուրիի կողմից կանցկացվեն վարպետության դասեր, և կքննարկվեն երիտասարդների ներկայացրած ծրագրերը։
«Salvador Fest»-ի կազմակերպիչներն են Հայաստանի երիտասարդական հիմնադրամը և Մարքեթինգի հայկական ակումբը:
Հայաստանի երիտասարդական հիմնադրամի
հասարակայնության հետ կապերի ծառայություն
