Ձերբակալված ազատամարտիկ, պահեստազորի գնդապետ Վոլոդյա Ավետիսյանի փաստաբան Արա Զաքարյանը շարունակում է դժգոհել քննչական մարմնի անգործությունից:
Այսօր «Զարկերակ» մամուլի ակումբում պարոն Զաքարյանն ասաց, որ քննչական մարմինը որեւէ գործողություն չի կատարում եւ միակ քայլը դատարան դիմելն էր՝ Վոլոդյա Ավետիսյանի կալանքի ժամկետը երկարացնելու միջնորդությամբ:
«Անգործության է մատնված, առաջնային գործողությունները, որոնք պետք է կատարեն, չի կատարվում, և դրա վրա դատարանները աչք են փակում: Նախաքննական մարմինը հիմքերը չի տրամադրում դատարանին՝ պատճառաբանելով, որ դա գաղտնիք է: Բոլոր փաստարկների վերաբերյալ քննիչը միայն կրկնում է, որ կատարվել են անհրաժեշտ գործողություններ, ապա այդ դեպքում առաջին գործողությունը առերեսումն է, ինչո՞ւ դա չի արվել»,- զարմանում է փաստաբանը:
Փաստաբանը տեղեկություն չունի, թե ինչ հիմքով է իր պաշտպանյալի նկատմամբ քրեական գործ հարուցվել , ըստ նրա, դատարանը տեղեկություն չի տրամադրում. «Հույս ունենանք, որ Վերաքննիչ դատարանը գոնե այս անգամ մատների արանքով չի նայի այս խնդիրներին: Վոլոդյան պնդում է, որ անկախ ամեն ինչից շարունակելու է պայքարը»:
Կարդացեք նաև
Պարոն Զաքարյանը Վոլոդյա Ավետիսյանին խորհուրդ չի տվել անցնել պայքարի ծայրահեղ միջոցների՝ օրինակ հացադուլի. «Այս պայմաններում դա անիմաստ կլինի»:
Պարոն Զաքարյանի պնդմամբ, իր պաշտպանյալի կալանքի ժամկետի երկարացման մասին որոշումն անօրինական է եւ ինքն արդեն բողոքարկել է Վերաքննիչ դատարանում:
Պարոն Զաքարյանը նորից կրկնեց, որ իր պաշտպանյալի նկատմամբ քաղաքական հետապնդում է իրականացվում եւ նրա անազատության մեջ գտնվելու միակ պատճառը հենց դա է. «Նրան մեկուսացնելու ուրիշ պատճառ չեմ տեսնում: Պաշտպանության նախարարի ասածը, որ նա պայմանավորվածություն ուներ Վոլոդյա Ավետիսյանի հետ, ով խախտել է այդ պայմանավորվածությունը, խոսում է այն մասին, որ նրան փորձում են մեկուսացնել»:
Արփինե ՍԻՄՈՆՅԱՆ
