Վազգեն Սարգսյանի անվան «Հանրապետական» ստադիոնում կայացած ֆուտբոլի «ՀՀ վարչապետի գավաթի» 5-րդ խաղարկության եզրափակիչը, որում գլխավոր մրցանակը վիճարկեցին ՀՀ պաշտպանության նախարարության եւ ՀՀ ոստիկանության թիմերը, պայքարի լարվածությամբ զարդարեց մրցաշարը:
Ուժային երկու կառույցների մարզական հակամարտությունում եղան թե գեղեցիկ գրոհներ, թե գնդակին տիրելու համար անհաշտ պայքար, թե վնասվածքներ, թե դեղին քարտեր՝ ճիշտ այնպես, ինչպես լինում է մեծ ֆուտբոլում:
Հանդիպման հիմնական ժամանակի 90 րոպեներին թիմերն անառիկ պահեցին իրենց դարպասները: Լրացուցիչ 10-ական րոպեանոց երկու խաղափուլերում էլ դարպասի գրավում չարձանագրվեց: Եվ «Վարչապետի գավաթի» խաղարկության պատմության մեջ առաջին անգամ հաղթողին որոշելու համար նշանակվեց 11 մետրանոցների հարվածաշար: Այստեղ արդեն ավելի դիպուկ գտնվեց Պաշտպանության նախարարության թիմը՝ 5:3: Հաղթողը եւ հաջորդաբար նրան հաջորդած ՀՀ ոստիկանության եւ ՀՀ կրթության եւ գիտության նախարարության թիմերը պարգեւատրվեցին համապատասխան գավաթներով, մեդալներով, դրամական խրախուսանքով, իսկ մրցանակային եռյակը կազմած թիմերի ֆուտբոլիստները, մարզիչները եւ ղեկավարներն արժանացան մեկական լրակազմ մարզահագուստի: Հատուկ մրցանակներ էին սահմանված նաեւ տարբեր անվանակարգերում:
Մրցաշարի գլխավոր կազմակերպիչ եւ պատասխանատու, ՀՀ սպորտի եւ երիտասարդության հարցերի փոխնախարար Խաչիկ Ասրյանը Հոբելյանական խաղարկության առիթով վարչապետ Տիգրան Սարգսյանին հանձնեց հատուկ գավաթ:
Կարդացեք նաև
Աշոտ ՀԱԿՈԲՅԱՆ
