Նոյեմբերի 22-ին ԱԳ նախարար Էդվարդ Նալբանդյանը մասնակցեց Հայաստանում Գերմանիայի դեսպանատան վերանորոգումից հետո բացման արարողությանը, որին ներկա էին Երևանի քաղաքապետարանի ներկայացուցիչներ, Հայաստանում հավատարմագրված դեսպաններ, Հայաստանում գործող ընկերությունների և գերմանական հիմնադրամների ղեկավարներ:
Շնորհավորելով դեսպանին և դեսպանության աշխատակիցներին շենքի վերաբացման կապակցությամբ, նախարար Նալբանդյանը մասնավորապես ասաց.
«Գերմանիան առաջին երկրներից էր, որն իր դիվանագիտական ներկայացուցչությունը բացեց նորանկախ Հայաստանում:
Հիշում եմ, որ սկզբում այն տեղակայված էր Հրազդան հյուրանոցի համեստ հարկաբաժնում, այնուհետև այս գեղեցիկ առանձնաշենքում, որն այժմ լիովին հիմնանորոգված է: Գերմանիայի դեսպանատան կենսագրությունը բնորոշում է նաև մեր երկու երկրների միջպետական հարաբերությունների` այս երկու տասնամյակների ընթացքում անցած կարևոր ճանապարհը:
Կարդացեք նաև
Գերմանիան Հայաստանի համար բարեկամ երկիր է, շատ կարևոր գործընկեր ինչպես երկկողմ ձևաչափով, այնպես էլ եվրոպական կառույցների շրջանակներում և միջազգային ասպարեզում: Հայաստանը բարձր է գնահատում Գերմանիայի կողմից Հայաստանին տնտեսական բարեփոխումների և զարգացման գործում ցուցաբերած կարևոր և շարունակական աջակցությունը:
Այսօր մեր երկու երկրների միջև հաստատված է սերտ քաղաքական երկխոսություն` ամրապնդված բարձր մակարդակի պարբերական փոխայցելություններով, առկա է արդյունավետ փոխգործակցություն` միջխորհրդարանական և տեղական իշխանությունների մակարդակով, ընդլայնվում է համագործակցությունը տնտեսական, մշակութային և կրթական ոլորտներում:
Ընդամենը օրեր առաջ Բեռլինում կայացած հանդիպումները Գերմանիայի իմ գործընկերոջ` արտաքին գործերի նախարար Գիդո Վեստերվելլեի և բարձրագույն իշխանության այլ ներկայացուցիչների հետ այդ երկխոսության արտահայտությունն են և այն առավել ամրապնդելու, խորացնելու և ընդլայնելու մեր երկուստեք ցանկության վկայությունը:
Ջերմորեն շնորհավորում եմ Հայաստանում Գերմանիայի դեսպանության այս գեղեցիկ շենքի վերանորոգման և վերաբացման կապակցությամբ:
Վստահ եմ, որ արդիականացված շինությունում, աշխատանքային այս նոր պայմաններում, Հայաստանում Գերմանիայի դեսպանության անձնակազմը` Ձեր ղեկավարությամբ, պարոն դեսպան, առավել եռանդով կշարունակի իր կարևոր ջանքերը` ի նպաստ մեր երկկողմ հարաբերությունների հետագա զարգացման:
Նորանոր հաջողություններ եմ մաղթում Ձեզ և վերահաստատում Հայաստանի իշխանությունների ամենայն աջակցությունը Ձեր այդ կարևոր առաքելությանը»:
ՀՀ ԱԳՆ
