ՀՀ առողջապահության նախարար Դերենիկ Դումանյանն ընդունեց Հայաստանում Ամերիկայի Միացյալ Նահանգների փոխդեսպան Վուդվարդ Փրայսին և ԱՄՆ պաշտպանության դեպարտամենտի Սպառազինությունների նվազեցման գործակալության ներկայացուցիչներին:
Հանդիպման ընթացքում քննարկվեցին երկուստեք հետաքրքրություն ներկայացնող հարցեր, մասնավորապես կողմերն անդրադարձան ՀՀ առողջապահության նախարարության կառուցվածքային և գործառնական վերջին բարեփոխումներին ու նոր գործառույթներին, ինչպես նաև Սպառազինությունների նվազեցման գործակալության ծրագրի շրջանակներում համատեղ միջոցառումների ներկա ընթացքին, առկա հարցերին և հետագա աշխատանքներին:
Այս ծրագրի շրջանակներում ամերիկյան կողմը առաջարկում է դիտարկել հատուկ վտանգավոր ախտածինների հետ աշխատող կենտրոնական կառույցի մի տարբերակ, որը կտեղակայվի Հիվանդությունների վերահսկման և կանխարգելման կենտրոնում` ամբողջությամբ այնտեղ մեկտեղելով Հատուկ վտանգավոր վարակների կանխարգեման կենտրոնը:
ՀՀ առողջապահության նախարար Դերենիկ Դումանյանն ընդգծեց, որ
Հիվանդությունների վերահսկման և կանխարգելման կենտրոնն ունենալու է կառավարման կենտրոնացված համակարգ և իր հիմնական գործունեությունը ծավալելու է վարակիչ և ոչ վարակիչ հիվանդությունների կանխարգելման ուղղությամբ` բացի լաբորատորից ունենալով նաև այլ գործառույթներ:
«Մենք բարձր ենք գնահատում ԱՄՆ կառավարության աջակցությունը տարբեր ծրագրերի իրականացման հարցում` հատկապես կարևորելով հատուկ վտանգավոր վարակների կանխարգելման գործում ԱՄՆ ջանքերը»,-նշեց նախարարը` ակնկալելով հետագա համատեղ աշխատանքների արդյունավետ իրականացում, քանզի հատուկ վտանգավոր վարակների տեսանկյունից Հայաստանը գտնվում է էնդեմիկ գոտում և պետք է պատրաստ լինել հիվանդությունների արագ արձագանքմանը:
Կարդացեք նաև
ԱՄՆ Պաշտպանության դեպարտամենտի Սպառազինությունների նվազեցման գործակալության համատեղ սպառազինությունների նվազեցման գրասենյակի փոխտնօրեն Բրեդլի Կարնն իր խոսքում շեշտեց, որ ծրագրի հետ կապված յուրաքանչյուր առաջարկ պատրաստ են ուսումնասիրել` հստակեցնելով համագործակցության սկզբունքները:
Անդրադառնալով առողջապահական ոլորտի տեսչական բարեփոխումներին` նախարար Դումանյանը տեղեկացրեց, որ ՀՀ Առողջապահության նախարարության պետական հիգիենիկ և հակահամաճարակային և ՀՀ աշխատանքի և սոցիալական հարցերի նախարարության ՀՀ աշխատանքի պետական տեսչությունների միաձուլումը նպատակ ունի բարձրացնել տեսչական գործառույթների արդյունավետ իրականացման որակը:
Նախարարը նշեց, որ Առողջապահական պետական տեսչությունը, որը ղեկավարվելու է կառավարման խորհրդի կողմից, ունենալով ներկայացուցիչներ ՀՀ ֆինանսների, էկոնոմիկայի, աշխատանքի և սոցիալական հարցերի ու առողջապահության նախարարություններից, ստանձնելու է նոր գործառույթներ` վերահսկելով բժշկական օգնության որակը, լիցենզավորման պայմանները և պահանջների պահպանումը, դեղորայքային շրջանառությունը, այդ թվում` գովազդը ոլորտում:
Հանդիպման ընթացքում կողմերը կարևորեցին տարբեր ծրագրերի միջոցով հետագա համագործակցության ամրապնդումը և զարգացումը:
