«Դրան վերաբերվում եմ` որպես մշակութային դիկտատ»,-Aravot.am-ի հարցին` ինչպե՞ս է վերաբերվում ռուսերենը աշխատանքային լեզու դարձնելու առաջարկին, այսպես պատասխանեց Նախախորհրդարանի համակարգող Գարեգին Չուգասզյանը:
Հիշեցնենք, որ այդպիսի առաջարկով էր հանդես եկել ԿԳ նախարար Արմեն Աշոտյանը: Այս կապակցությամբ Գարեգին Չուգասզյանը նկատեց, որ «մեծապետական մշակութային դիկտատ է ընթանում» և շարունակեց. «Այստեղի` երևանյան մանկլավիկները, ոչ միայն ծառայում, այլև նախաձեռնում են նման առաջարկներ և ոտնահարում են թե՛ ՀՀ Սահմանադրությունը, թե՛ ազգային արժանապատվությունը»:
Խոսելով ռիսկերի մասին` պարոն Չուգասզյանն ասաց. «Սովետական տարիներին Երևանի դպրոցների կեսը ռուսական էին: Այս ամենը սկսվեց 1937-ին` երկու դպրոցից, հիմա ապրում ենք ուրիշ դարաշրջանում, և ամեն ինչ շատ ավելի արագ է ընթանում, ուստի վտանգները շատ մեծ են, ու թույլ չպիտի տալ, որ դուռը բացվի»:
Տաթև ՀԱՐՈՒԹՅՈՒՆՅԱՆ
