Սփյուռքահայ գործարար Էդմոն Խուդյանը որոշել է դատի տալ Հայաստանի կառավարությանը: Այսօր ինտերնետ-կապի միջոցով «Հենարան» ակումբում լրագրողներին ասաց Էդմոն Խուդյանը:
Նա, այլեւս հույս չդնելով Հայաստանի արդարադատության համակարգի վրա, մտադիր է իր խնդիրը լուծել միջազգային ատյանի միջոցով. պարոն Խուդյանը մոտ ժամանակներս հայց կներկայացնի ԱՄՆ-ում գործող ներդրումների միջազգային կենտրոն (ICSID- Centre fot Settlement of investment disputes): «Այս հարկադրված քայլը ոչ թե Հայաստանի դեմ է, այլ` հանուն Հայաստանի, քանի որ միայն այդ կերպ է հնարավոր վերականգնել արդարադատությունը»,-ասաց գործարարը:
Հիշեցնենք, որ գործարարի պնդմամբ, նրա «Արին կապիտալ» ներդրումային ընկերությանը Հայաստանում բարձրաստիճան պաշտոնյաների հովանավորությամբ դիտավորյալ սնանկացման են տարել : Նշենք, որ «Արին կապիտալը» Մաշտոցի 33/1 եւ 33/ա հասցեում բազմաբնակարան շենք կառուցելու համար Վլադիսլավ Մանգասարյանին պատվիրել է շինաշխատանքներ, որն էլ Խուդյանի` ՀՀ-ից բացակայելու ընթացքում, համաձայնության գալով ընկերության տնօրեն Էդիկ Եսայանի հետ, կեղծել է Խուդյանի ստորագրությունները, որի արդյունքում, շենքում եղած ու արդեն սեփականատեր ունեցող բնակարանները վաճառել են մեկ այլ անձանց: Վլադիսլավ Մանգասարյանն այժմ կալանավորված է, սակայն, ինչպես պարոն Խուդյանն ու նրա փաստաբաններն են պնդում, արդեն 3 տարի է, նախաքննական փուլն է ընթանում, մինչդեռ այս ընթացքում, եթե իրականում արդարադատություն լիներ Հայաստանում, իրական հանցագործները կբացահայտվեին:
Պարոն Խուդյանը միջազգային ատյաններին հայցով դիմելու առնչությամբ, համեմատություն արեց նաեւ ԱԺ պատգամավոր Վարդան Այվազյանի հետ, որին եւս միջազգային ատյանը պատասխանատվության էր ենթարկել եւ պարտավորեցրել մոտ 39 միլիոն դոլար վճարել:
Aravot.am-ը պարոն Խուդյանից հետաքրքրվեց՝ արդյոք հնարավորություն կա՞ շահել գործը եւ, այսպես ասած` հաղթել ՀՀ կառավարությանը, պարոն Խուդյանն ասաց. «Հայաստանի Հանրապետության կառավարությանը պատասխանատվության ենթարկելը կամ նրանից, որպես վնասի փոխհատուցում ստանալը, Համաշխարհային բանկով է պայմանավորված»:
Թե է՛լ ովքեր պետք է փոխհատուցում պահանջեն միջազգային ատյանում եւ պարոն Խուդյանի պատասխանի մանրամասները` տեսանյութում:
Նելլի ԲԱԲԱՅԱՆ
