«Ինձ համար դա անսպասելի չէր: Եվ այս մասին ես ասել եմ «Իրավունք» թերթին դեռ մեկ տարի առաջ տված՝ «Արեւմուտքը ճնշելու է Սերժ Սարգսյանին, որը վարում է Ռուսաստանի հետ մերձեցման քաղաքականություն» հարցազրույցում: Եթե ուշադիր, ոչ մակերեսային հետեւենք արտաքին քաղաքականությանը, ակնհայտ է դառնում ռուսական ուղղության գերակայությունը՝ 1992 թվականից: Շեղումներ եղել են, բայց գլխավոր ուղղությունը միշտ էլ եղել է դեպի ՌԴ»,- «Առավոտի» հետ զրույցում ասաց ՀՀ պաշտպանության նախկին նախարար, գեներալ-լեյտենանտ Վաղարշակ Հարությունյանը՝ պատասխանելով հարցին՝ չե՞ք կարծում, որ ՄՄ-ին անդամակցելու Սերժ Սարգսյանի որոշումը հապճեպ էր եւ միանձնյա: Մեր զրուցակիցը զարմանում է, որ այն բանից հետո, երբ ստորագրվում է ՀՀ-ում ռուսական ռազմաբազաների ժամկետը երկարաձգելու պայմանագիր, Հայաստանը դառնում է ՄՄ-ի դիտորդ անդամ, ՌԴ-ի հետ տասնյակ այլ համաձայնագրեր ու պայմանագրեր են ստորագրվում՝ վարչապետերի ու այլ պաշտոնյաների մակարդակով, երբ անընդհատ ասվում է, անգամ ԱԳ նախարար Էդվարդ Նալբանդյանի կողմից, որ Հայաստանն ունի ռազմավարական գործընկեր՝ ՌԴ, իսկ մյուս պետությունների հետ զարգացնում է իր գործընկերային հարաբերությունները, հնչում են տեսակետներ, թե ՄՄ-ին անդամակցելու որոշումն անսպասելի էր: Վաղարշակ Հարությունյանը հիշեցնում է մեկ տարի առաջ Սերժ Սարգսյանի՝ ՊՆ-ում արած հայտարարությունը. «Հայաստանի գլխավոր խնդիրն անվտանգությունն է, որը մենք ապահովում ենք ՌԴ-ի միջոցով, ու դա է որոշում մեր քաղաքականությունը»,- ու զարմանք է արտահայտում. «Ի՞նչ կա այստեղ հապճեպ կամ անսպասելի»:
«Առավոտ» օրաթերթ
