«Փրկենք հուշարձանն օլիգարխից» նախաձեռնությունն այսօր կրկին ակցիա էր անցկացնում Մաշտոցի պուրակում, որտեղից էլ նախաձեռնության սակավաթիվ անդամները շարժվեցին դեպի «Փակ շուկա»:
Aravot.am-ի հետ զրույցում նախաձեռնության անդամ Տիգրան Խզմալյանն ասաց, որ իրենց համար հոգ չէ մարդաշատ ակցիաների կազմակերպումը, պարզապես դրա համար քաղաքապետարանի թույլտվությունն է անհրաժեշտ, իրենք էլ չեն ցանկանում չինովնիկական քաշքշոցի մեջ ընկնել: «Եթե պետք եղավ, մարդաշատ ակցիաներ էլ կանենք»,- հավաստիացրեց մեր զրուցակիցը՝ հավելելով, որ իրենց համար «Փակ շուկայի» սեփականատեր Սամվել Ալեքսանյանը թիրախ չէ. «Մենք պայքարում ենք քրեաօլիգարխիկ համակարգի դեմ»:
Ակցիայի մասնակիցները երթով Մաշտոցի պուրակից շարժվեցին դեպի «Փակ շուկա»՝ «Երեւան սիթիները» բոյկոտելու, «օլիգարխներից առեւտուր» չանելու ու համանման այլ կոչերով: Շուկայի հարակից տարածքում մի քանի րոպե կանգնելուց հետո, նախաձեռնության անդամները հայտարարեցին, որ երթով կշարժվեն դեպի գլխավոր դատախազության շենք եւ ակցիան կշարունակեն այնտեղ: Այնտեղ ցուցարարները պահանջեցին ազատ արձակել բոլոր ապօրինի կալանավորվածներին՝ ի դեմս Վարդան Պետրոսյանի:
«Մեր երկրում կալանքի միջոցը պետության ձեռքին դարձել է պատժիչ գործիք»,- հայտարարեցին ցուցարարները՝ թվարկելով օրենքի այն դրույթները, թե ե՞րբ կարող են անձին պահել կալանքի տակ:
Կարդացեք նաև
Ակցիայի եւ Տիգրան Խզմալյանի հարցազրույցի մանրամասները՝ տեսանյութում
Նելլի ԳՐԻԳՈՐՅԱՆ
