Վաղը ՀՀ կառավարության նիստում ֆինանսների նախարարությունը վարչապետ Տիգրան Սարգսյանին կառաջարկի հավանություն տալ Եվրոպական ներդրումային բանկի (ԵՆԲ) եւ ՀՀ-ի միջեւ կնքվելիք պայմանագրին: Հյուսիս-հարավ ճանապարհային միջանցքը կառուցելու համար ֆիննախը ֆինանսական պայմանագիր է պատրաստել: ԵՆԲ-ն մտադիր է ծրագրի շրջանակներում տրամադրել 60 միլիոն եվրոյի չափով վարկ` «Հայաստանի «Հյուսիս-հարավ» ճանապարհային միջանցք» ծրագրի ֆինանսավորման համար: Վարկը նախատեսվում է տրամադրել առավելագույնը 12 տրանշներով` նվազագույնը 5.000.000 եվրո գումարով յուրաքանչյուր մասնաբաժնի համար: Այս մասին տեղեկանում ենք կառավարության նիստի օրակարգից:
Նշենք, որ պայմանագրով կիրականացվի Լանջիկ-Գյումրի (27.3 կմ երկարությամբ) ճանապարհահատվածի շինարարությունը: Եվրոմիության Հարեւանության ներդրումային գործիքից էլ 12 մլն եվրոյի չափով դրամաշնորհ կհատկացվի, որի մի մասը` 6 մլն եվրոն, կտրամադրվի վերոնշյալ շինարարությունը վերահսկելու համար, իսկ մնացած գումարը կհատկացվի Գյումրիի շրջանցիկ ճանապարհի եւ Գյումրի–Բավրա ճանապարհահատվածների տեխնիկատնտեսական ուսումնասիրությունը եւ մանրամասն նախագծումը կատարելու համար` հետագայում շինարարության իրականացման նպատակով:
Հյուսիս-հարավ ճանապարհի ծրագիրը ֆինանսավորվելու է նաեւ Ասիական զարգացման բանկի կողմից տրամադրվելիք վարկի, ՀՀ կողմից համաֆինանսավորման եւ այլ աղբյուրներից ենթադրվող ֆինանսավորման հաշվին:
Կարդացեք նաև
Լուսինե ԲՈՒԴԱՂՅԱՆ
