Փորձաքննությունը հաստատել է 18 հոգու մահվան պատճառ դարձած ավտովթարի մեջ մեղավոր է «Կամազ» բեռնատարի վարորդ Հրաչյա Հարությունյանը: Հայտնում է «ԻՏԱՌ ՏԱՍՍ» լրատվականը՝ հղում անելով Մոսկվայի ՆԳՆ-ի մամուլի ծառայությանը:
Մայրաքաղաքի ՆԳՆ-ն ստացել է դատաբժշկական և երեք ավտոտեխսպասարկման փորձաքննության արդյունքները, որոնք նշանակված էին ավտովթարի քրեական գործով: Ավտոտեխսպասարկման փորձաքննությունից հետևում է, որ վարորդի գործողություններում նկատվում է ճանապարհային երթևեկության և մեքենայի շահագործման կանոնների խախտում:
Բացի այդ, հայտնի է դարձել, որ մեղադրյալի վարած ավտոմեքենան երկար ժամանակ տեխսպասարկում չի անցել. «Դրա պատճառով արգելակման համակարգը բարվոք չէ աշխատել, ինչի մասին մեղադրյալը պետք է տեղյակ լիներ», – նշել են ՆԳՆ-ի գլխավոր վարչությունից:
Ավելի վաղ հաստատվել էր, որ «ավտովթարի պահին բեռնատարը ծանրաբեռնված է եղել, ինչը էլ ավելի անարդյունավետ է դարձրել արգելակման համակարգի աշխատանքը, ինչի արդյունքում ճանապարհի հատվածի այդ մասում այն չի կարողացել կանգնել»:
Կարդացեք նաև
Ոստիկանությունից տեղեկացրել են, որ Հարությունյանի դատաբժշկական փորձաքննությունը պարզել է, որ և՛ վթարից առաջ, և՛ հետո վարորդը գտնվել է գիտակից վիճակում և վերահսկել է իր գործողությունները:
2013թ. հուլիսի 13-ին Հրաչյա Հարությունյանը Պոդոլսկի մոտակայքում բեռնատարով բախվել էր Ավտոբուսին: 18 հոգի մահացել էր, 60-ից ավելի մարդ վիրավորվել: Հարությունյանի գործը մեծ աղմուկ բարձրացրեց, երբ վթարից հետո նրան դատարան էին տարել չսափրված, կանացի խալաթով և հողաթափերով:
Պատրաստեց Հովհաննես ԻՇԽԱՆՅԱՆԸ
