Այսօր կայացած Հայաստանի բռնցքամարտի ֆեդերացիայի հաշվետու ընտրական համաժողովն ընդունեց նախկին նախագահ Արման Մուրադյանի հրաժարականը: Aravot.am-ը ֆեդերացիայի 1-ին փոխնախագահ Դերենիկ Գաբրիելյանից հետաքրքրվեց, թե ի՞նչն է եղել նման որոշում կայացնելու պատճառը:
– Պարոն Գաբրիելյան: Դուք ֆեդերացիայում ամենաշատն եք շփվել Արման Մուրադյանի հետ, հետեւաբար, կարող եք ասել, թե ինչո՞ւ նա որոշեց հեռանալ հայկական բռնցքամարտից, ինչը շատերի համար անակնկալ էր:
– Ոչ մի արտառոց պատճառ չկա: Դեռ ամռանը պարոն Մուրադյանը դիմել էր ֆեդերացիայի գործկոմին, որ ցանկանում է հրաժարական տալ: Բայց հաշվի առնելով, որ մրցաշրջանը դեռ չի ավարտվել եւ հաստատած ծրագրերը պետք է մինչեւ վերջ իրականացնել, խնդրեցինք նրան առայժմ շարունակել ղեկավարել ֆեդերացիան, ինչին նա ընդառաջ գնաց:
Վերջին մրցումը եղավ Անապայում` Եվրոպայի պատանիների առաջնությունը, որտեղ Հայաստանը մեկական ոսկի եւ բրոնզ նվաճեց: Առաջնության մասնակցությունն ամբողջությամբ ֆինանսավորել էր Արման Մուրադյանը: Միայն դրանից հետո` նոյեմբերի 16-ին կայացած գործկոմի նիստում նա զեկույցով հանդես եկավ: Շնորհակալություն հայտնելով բոլոր նրանց, ովքեր այս ընթացքում աշխատել են իր հետ, պարոն Մուրադյանը, այնուամենայնիվ, խնդրեց ընդունել իր հրաժարականը: Բայց նշեց նաեւ, որ չի կարող լրիվ անտեսել հայկական բռնցքամարտը եւ պատրաստակամություն հայտնեց անհրաժեշտության դեպքում աջակցել:
Կարդացեք նաև
– Այնուամենայնիվ, տեղյակ չէ՞ք հրաժարականի բուն պատճառի մասին:
– Պատճառը զբաղվածությունն է: Գիտեք, որ նա բիզնեսմեն է (Արման Մուրադյանը ԲԱՄՕ հանրահայտ ընկերության հիմնադիր ընտանիքից է: Ա. Հ.), ապրում է Ռուսաստանում, որի պատճառով ի վիճակի չէ այն չափով կազմակերպել եւ իրականացնել այն ծրագրերը, որոնք ինքն էր նախանշել: Այս առումով, կարծում եմ, Արման Մուրադյանը ճիշտ որոշում է կայացրել:
– Հնարավո՞ր է, որ նա բավարարված չէր այս տարիների ընթացքում ներդրած գումարների դիմաց ձեռք բերված արդյունքներից:
– Ոչ: Այդպիսի բան չկա:
Աշոտ ՀԱԿՈԲՅԱՆ
