«Հայկը պատմում էր` 5 օր կիսաքուն նստացույցի են եղել, էներգիաները սպառված վիճակում էին: Իրենք հստակ հեղափոխություն անելու էին գնացել, իրենց ակցիան գիտակցել են, բայց հետեւանքը, որ սադրանքի պատճառով կհայտնվեն քրեական անձնավորության կարգավիճակում, չեն պատկերացրել»,- Aravot. am-ին ասաց Քրեական օրենսգրքի 316 հոդվածի 2-րդ մասով` իշխանության ներկայացուցչի նկատմամբ բռնություն գործադրելու մեղադրանքով ձերբակալված Հայկ Հարությունյանի փաստաբանը` Արտեմ Ալեքսանյանը:
Նա դեռ չի ցանկանում մանրամասնել, թե ինչ սադրանքների մասին է իրեն երեկ պատմել իր պաշտպանյալը. «Չեմ պատրաստվում հրապարակել: Մինչեւ ամբողջ ծավալով նյութերը չպահանջեմ, չեմ ասի ինչ-որ բան»:
Ըստ նրա, Քրեական օրենսգրքի 316 հոդվածը «Մարտի 1»-ից հետո շատ մոդայիկ է դարձել, բայց իր պաշտպանյալի գործողությունների ու առաջադրված մեղադրանքի համարժեքության մասին էլ, ըստ նրա, դեռ վաղ է գնահատականներ տալ. «Ինչ վերաբերում է `բռնությունների կիրառմանը, կադրերում տեսնում ենք, բայց միայն մասնագիտական վերլուծության արդյունքում դրա մասին գնահատական կտամ»:
Փաստաբանը զգուշավոր է, որովհետեւ մտավախություններ ունի. «Հնարավոր է` իմ բերանը փակելու համար Հայկին նեղեն, որ ինչ-որ բաներ չասեմ, անհրաժեշտության դեպքում ԶԼՄ-ներին կասեմ: Այս պահին Հայկին նեղելու փորձեր չեմ նկատել, բայց մտավախություն ունեմ»:
Կարդացեք նաև
Երեկ Հայկին հանդիպած փաստաբանը նաեւ պատմեց, որ իր պաշտպանյալն ու մյուս ձերբակալված ակտիվիստները ստացել են քրեական վարույթն իրականացնող մարմնի որոշումը` ոստիկանների նկատմամբ քրեական գործի հարուցման մերժման մասին. «Ոստիկանության աշխատակիցների նկատմամբ քրեական գործ չի կարող հարուցվել, որովհետեւ նրանք գործել են օրինականության սահմաններում: Բողոքարկումը չարժի էլ անել, որովհետեւ անիմաստ է, որովհետեւ բոլորս էլ հասկանում ենք` դատարանը չի կարող հանկարծ որոշել` չէ, քրեական գործ պետք է հարուցեք ոստիկանների նկատմամբ»:
Հիշեցնենք, որ նոյեմբերի 5-ին Մաշտոցի պողոտայում տեղի ունեցած միջադեպի հետեւանքով դեռ 13 ակտիվիստ կա ձերբակալված:
Արփինե ՍԻՄՈՆՅԱՆ
