Ընդհանրապես Հայաստանի և Ադրբեջանի նախագահների հանդիպումները դրական երևույթ են։ Այս մասին այսօր լրագրողների հետ հանդիպմանն ասաց ԱԺ ՀԱԿ խմբակցության ղեկավար Լևոն Զուրաբյանը՝ պատասխանելով լրագրողներից մեկի հարցին։ Նրա խոսքով՝ բանակցությունների ընթացքը շատ կարևոր է՝ անգամ ոչ լեգիտիմ նախագահների միջև: Ուստի, ՀԱԿ խմբակցության ղեկավարը դրական է գնահատում Սարգսյան-Ալիև հանդիպումը. «Եթե կան բանակցություններ, և դրանք աջակցություն ունեն ԵԱՀԿ-ի, ՄԱԿ-ի Անվտանգության խորհրդի կողմից, նշանակում է, որ աշխարհը բանակցությունների հետ ինչ-որ հույս կապում է, և դա կարևորագույն երաշխիքն է, որ գործընթացը չի զարգանում ռազմական ճանապարհով»:
Լրագրողների այն դիտարկմանը, որ Սերժ Սարգսյանը նորմալ է գնահատել Ադրբեջանի նախագահի հետ հանդիպումը, Լեւոն Զուրաբյանն ասաց․«Ես չեմ կարող հավատալ Սերժ Սարգսյանի որևէ խոսքի։ Մենք պիտի հավատանք մի մարդո՞ւ, ով դիվանագիտական գործընթացների վերաբերյալ մշտապես մոլորեցրել է հասարակական կարծիքը, միշտ խաբել է, չի ներկայացրել եվրաասոցացման գործընթացը, հայ-թուրքական արձանագրությունների ստորագրման նախապայմանը»։
Նելլի ԳՐԻԳՈՐՅԱՆ
