Նախկին ընտրական ցիկլում կատարված ընտրակեղծիքները ժողովրդին պարզ ապացուցեցին, որ ստեղծված է ընտրական կեղծարարությունների այնպիսի մեքենա, որը կանխում է ընտրություններով ՀՀ-ում իշխանափոխություն իրականացնելը: Այսօր այս մասին «Հայացք» մամուլի ակումբում հայտարարեց ՀԱԿ խմբակցության ղեկավար Լեւոն Զուրաբյանը: Ու քանի որ այս ամենի արդյունքում հասարակությունը հիասթափության եւ ապատիայի մեջ է, բանախոսը նաեւ դրանով է պայմանավորում այն, որ ՀԱԿ-ը հիմա հանրահավաքներ չի անցկացնում:
Որ առաջացած ճգնաժամը, վաղ թե ուշ պետք է քաղաքական գործողությունների ակտիվացման հանգեցնի, բանախոսն այլընտրանք չի տեսնում: Իսկ, մինչ այդ, քաղաքական պայքարի ամենաարդյունավետ միջոցը նա համարում է այն, որ ժողովուրդը հանդես է գալիս իր կոնկրետ շահերին առնչվող նախաձեռնություններով եւ դա զուգորդվում է ԱԺ-ում չորս ընդդիմադիր խմբակցությունների համատեղ աշխատանքով:
Այդ իմաստով, նա դրական օրինակ է բերում պարտադիր կուտակային կենսաթոշակային համակարգի դեմ համատեղ պայքարի օրինակը:
Լեւոն Զուրաբյանն, ընդհանրապես, այս տարիների ձեռքբերումը համարում է խորհրդարանական ընդդիմության համատեղ եւ համախմբված աշխատանքը, որն աննախադեպ է համարում. «Սա բանալին է մինչև հեղափոխությունը»:
Կարդացեք նաև
Ու, այս իմաստով, բանախոսը բնավ էլ պատահական չի համարում իշխանական քարոզչության կողմից տարվող այն թեզը, որ քաղաքական կուսակցությունները իրենց արդեն սպառել են, կարեւորը քաղաքացիական շարժումներն են. «Իրենց նպատակն է սեպ խրել այս երկու քաղաքական բաղադրիչների մեջ ու իրարից անջատել: Մինչդեռ, մեր ուժը համախմբման մեջ է:
Նելլի ԳՐԻԳՈՐՅԱՆ
