Քաղաքագետ Հրանտ Մելիք-Շահնազարյանն այսօր «Հենարան» ակումբում անդրադարձավ երեկ Վիեննայում կայացած Սերժ Սարգսյան- Իլհամ Ալիեւ հանդիպմանը: Ըստ քաղաքագետի՝ այս հանդիպման գլխավոր ձեռքբերումն այն է, որ Ալիեւին երկու տարի անց վերադարձրին բանակցությունների սեղան: Նա ասաց, որ Մինսկի խմբի ջանքերը՝ այդ հանդիպումը իրականություն դարձնել, հույսեր են ներշնչում, որ կա հավանականություն, որ այդ հանդիպումները շարունակական կդառնան:
«Սահմաններին հնչած յուրաքանչյուր կրակոց, ուղղված է նաեւ Մինսկի խմբին»,-ասաց պարոն Մելիք-Շահնազարյանը՝ նկատելով, որ համանախագահները երբեմն, կուլ գնալով Հայաստանի եւ Ադրբեջանի հանդեպ համանման եւ համարժեք վերաբերմունք ցուցաբերելու եւ երկու կողմերի միջեւ մշտապես հավասարության նշան դնելու ձգտմանը՝ անուղղակիորեն նպաստում են Ադրբեջանի ագրեսիվությանը:
Սակայն իրական եւ լուրջ առաջընթաց, ըստ Հ. Մելիք-Շահնազարյանի, կգրանցվի միայն այն ժամանակ, երբ Արցախը կդառնա լիիրավ բանակցող կողմ:
Մելանյա ԲԱՐՍԵՂՅԱՆ
