ՀՀ կառավարության 2013թ. հուլիսի 18-ի որոշմամբ ՀՀ կառավարության գործունեության մշակութային քաղաքականության գերակա ուղղություն է ընդունվել հայկական գորգարվեստի հանրահռչակումը:
Ողջ տարվա ընթացքում իրականացվել են տարաբնույթ միջոցառումներ հայկական գորգագործական մշակույթի վերաբերյալ առավելագույն տեղեկատվության տարածման, պատմության և առկա վիճակի ներկայացման ուղղությամբ:
Հոկտեմբերից ԼՂՀ Շուշի քաղաքում աշխատանքն է սկսել իր տեսակի մեջ եզակի հնագույն և ժամանակակից գորգերի թանգարանը:
Տարվա կարևոր ձեռքբերումներից կարելի է համարել նաև Տավուշի մարզի Դիլիջան քաղաքում «Մշակութային վերածնունդ» խորագրով գորգագործության և կիրառական արվեստի փառատոնը, Ֆոլկմար Գանցհորնի «Քրիստոնեական արևելյան գորգ» աշխատության հայերեն թարգմանությունը և հրատարակումը:
Կարդացեք նաև
Լոնդոնում հրատարակվող գորգարվեստի ուղղվածությամբ «Հալլի» ամսագրի գլխավոր խմբագիր Բեն Էվանսն այսօր լրագրողների հետ հանդիպման ժամանակ ասաց, որ եղել է բոլոր այն երկրներում, որտեղ զարգացած է գորգագործությունը, և անչափ հետաքրքրված է հայկական գորգերով:
Մշակութային արժեքների փորձագիտական կենտրոն ՊՈԱԿ-ի փորձագետ, ազգագրագետ Աշխունջ Պողոսյանը նկատեց, որ հայոց գորգագործական մշակույթը բավարար չափով ուսումնասիրված չէ մասնագիտական շրջանակներում: Նա կարևորեց գիտաժողովը հույս հայտնելով, որ այն երիտասարների ուշադրությունը կհրավիրի հայոց գորգարվեստի վրա:
Տեղեկացնենք, որ Հայաստանի պատմության թանգարանում բացվել է «Հայկական գորգարվեստ» խորագրով ցուցահանդեսը, որտեղ ներկայացված են 17-20-րդ դդ. հայկական գորգի դասական նմուշներ Հայաստանի պատմաազգագրական գրեթե բոլոր տարածաշրջաններից՝ Վասպուրական, Ուտիք, Ջավախք, Կիլիկիա, Պարսկահայք և այլն:
Իսկ նոյեմբեր-դեկտեմբեր ամիսներին Հայաստանի ազգային պատկերասրահում հասարակությանը կներկայացվեն Մուշեղ և Միքայել Մարտիրոսյան-Չալոյանների գորգերի հավաքածուները:
Հայաստանում «Հայկական հանգույց. գորգարվեստի ավանդույթները» միջազգային գիտաժողովը կմեկնարկի վաղը՝ նոյեմբերի 20-ին: Գիտաժողովին կմասնակցեն հեղինակավոր մասնագետներ ԱՄՆ-ից, Ֆրանսիայից, Իտալիայից, Գերմանիայից, Մեծ Բրիտանիայից և այլ երկրներից: Գիտաժողովում ներգրավված են նաև գորգագործության բնագավառում գործունեություն իրականացնող կազմակերպությունները:
Սիրանուշ ՀԱՅՐԱՊԵՏՅԱՆ
