Օրերս Ազգային ժողովում կենտրոնական բանկի նախագահ Արթուր Ջավադյանի եւ ԱԺ պատգամավոր Հրանտ Բագրատյանի միջեւ, մեղմ ասած` «լեզվակռիվ» եղավ ԿԲ-ի գործունեության հետ կապված: Այսօր «Հայացք» ակումբում Հրանտ Բագրատյանը անդրադարձավ այդ վիճաբանությանը, նշելով, որ ինքն ընդամենը հարց է բարձրացրել, մինչդեռ ԿԲ նախագահը պատգամավորին վիրավորել է անհարկի:
Պարոն Բագրատյանը մեկ անգամ եւս պատմեց, թե ինչ է տեղի ունեցել ԱԺ-ում. «Ոչ ոք չէր վիրավորել Ջավադյանին, կանգնեց ամբիոնում ու ասեց` ինչ ա, չգիտեք… ասում եմ` ԿԲ-ն նորմալ պայմաններում մի 200 միլիարդ դրամ, բյուջեի եկամուտների 20%-ը պիտի տար, կոպեկ չեք տալիս բյուջե: Ասում է` դուք չգիտեք, որ վնասաբեր ենք արժույթի քաղաքականության պատճառով: Նախ` ասեմ, որ վերջին 2 տարին արժույթն այնուամենայնիվ, արժեզրկվել է, եւ մենք շարունակում ենք մնալ զրո սպասելիքներով ԿԲ-ից: Ես ասացի` արժույթը մեզ մոտ ազատ չէ, նա էլ ասաց` ոնց թե ազատ չէ: Բացատրեցի, որ ազատ կլինի այն դեպքում, երբ դրսից եկող տրանսֆերտները դուք ստերիլիզացնեք: Հանկարծ բորբոքվեց ու ասեց` դատարկ, անհետաքրքիր ու հիմար հարցադրումներ եք անում: Այսպիսի բան ասողը` ինքն է հիմար: Այս մարդը, գյուղինստիուտն ավարտած, երբեք բանկիր չի դառնա, բացառվում է, այդ ինտելեկտը չկա այնտեղ, նա երբեք չի հասկանա ժամանակակից կենտրոնական բանկի էությունը: Ինձ վրդովեցրեց, որ ես սովորական, մեղմ հարցրեցի, իսկ նա ինչ պատասխանեց: Երբ նեղն են ընկնում, այդպես են պատասխանում:
ԱԺ նախագահը, որ մեկը հանկարծ ընդդիմությունից մի բան է ասում, կոչ է անում լինել բարեհամբյուր, նրան չընդհատեց, որեւէ բան նրան չէր ասվել: Մարդը կանգնել ամբիոնից կմկմում էր, ու չէր կարողանում ապացուցել թե ուր է այն 180-200 միլիարդ եկամուտը, որ պիտի գար ու էս ժողովրդին տրվեր: Իսկ ես գիտեմ ուր է, այդ բանկերն էլ իրենց են պատկանում, որ բանկը պրոբլեմ է ունենում, ինքը տալիս է դրանց: Եվ ես լրջորեն կասկածում եմ: Վաղը կհայտարարեն, որ այսպիսի բան չկա, բայց հայտարարելով չի է, բալանսները բերեք»:
Նելլի ԲԱԲԱՅԱՆ
