Հայաստանում տեղական ինքնակառավարման համակարգի ձեւավորման 17-ամյակի կապակցությամբ նոյեմբերի 10-ին ՀՀ տարածքային կառավարման նախարարության եւ Հայաստանի համայնքների միության կողմից անցկացվել է «Տարվա լավագույն համայնք-2013» մրցանակաբաշխությունը: «Կանաչապատ համայնք» անվանակարգում Իջեւանին տրվել է հատուկ մրցանակ:
2013թ. հոկտեմբերի 25-ին Իջեւանում, ՀՀ վարչապետ Տիգրան Սարգսյանի մասնակցությամբ կայացավ արվեստի փառատոն: Այդ ծրագրի շրջանակներում քաղաքային զբոսայգու վնասված քանդակները նորոգվեցին, Իջեւանի սիմպոզիումի ընթացքում ստեղծված քանդակների մի մասը տեղափոխվեց գետափնյա փողոց, քանդակների մոտ գիշերային լուսավորության ցանց անցկացվեց: Նույն ծրագրի շրջանակներում ներկայումս նորոգվում է քաղաքի Շատրվանների հրապարակը: Սակայն Իջեւանի կենտրոնում դեռեւս զբոսնում են կովերը:
Նոյեմբերի 19-ին Իջեւանի կենտրոնական՝ Անկախության փողոցի մայթին անասունների արտաթորանք տեսանք: Իջեւանի շրջգործկոմի տարիներ առաջ այրված շենքի առաջ տեսանք 5 կովից բաղկացած նախիր: Կովերի մի մասն արածում էր ծառերի տակ:
Նախկինում անդրադարձել ենք Իջեւանի կենտրոնում թափառող անասուններին: Մի քանի օր առաջ Իջեւանում, գիշերվա ժամը 11-ին մարդատար ավտոմեքենան միջպետական ճանապարհին վրաերթի է ենթարկել կովի, անասունը սատկել է: Իջեւանի քաղաքապետարանի աշխատողները բազմիցս արգելափակել են քաղաքի տարածքում թափառող կովերին, սակայն դա անասնատերերին դաս չի եղել:
Կարդացեք նաև
Ոսկան ՍԱՐԳՍՅԱՆ
