«Ես առանց խոչընդոտի եմ ներս մտել շինհրապարակ: Արաբկիրի նախկին փոխոստիկանապետ Արայիկ Պետրոսյանը մոտեցավ, ինձ հարցրեց՝ չե՞ք ուզում կանգնեցնել ապօրինությունը, ինչո՞ւ չեք մտնում շինհրապարակ, ասացի՝ դուք կանգնած եք իմ ճանապարհին, ասաց՝ ես ձեզ ներս կթողնեմ ու ուղեկցեց ներս»,- այսօր Վարչական դատարանում պարզաբանում էր «Նախախորհրդարանի» անդամ Տիգրան Խզմալյանը: Հիշեցնենք, որ ոստիկանությունը դիմել է դատարան՝ Խզմալյանին ոստիկանի օրինական պահանջը չկատարելու մեջ մեղադրելով:
Պարոն Խզմալյանի պատմելով, նախկին փոխոստիկանապետի հրավերով շինհրապարակ է մտել ու դուրս չի եկել՝ ասելով, որ իրավունք ունի թույլ չտալ շինարարության շարունակությունը, որը անօրինական է:
Նա դատարանին նաեւ հայտնեց իր տեղեկությունները, թե 2010 թվականին նախկին քաղաքապետ Զախարյանը շինթույլտվություն էր տվել այդ հասցեում, ինչը վիճարկվել էր քաղաքացիների կողմից եւ մի քանի դատական գործողություններ են տեղի ունեցել. «2012-ին դատարանի թույլտվությամբ կասեցվել է շինարարության ընթացքը: Շինարարությունը շարունակելու օրինական հիմքեր չկան… Շինարարությունը պետք է իրականացվի օրենքով»:
Դատական նիստը հետաձգվեց: Դատավոր Դարբինյանն ասաց, որ հաջորդ նիստի մասին կողմերը լրացուցիչ ծանուցում կստանան:
Կարդացեք նաև
Պարոն Խզմալյանն էլ դատական նիստից հետո ավելացրեց, որ Արայիկ Պետրոսյանը սադրել է իրեն՝ շինհրապարակ ուղեկցելով, հետո ասաց՝ իրենք ամեն ինչ արեցին, որ կանանց ու աղջիկներին սեռական բնույթի հայհոյանքներով դիմող Արայիկ Պետրոսյանը էլ չաշխատի համակարգում:
Արփինե ՍԻՄՈՆՅԱՆ
