Հեղինակավոր Forbes ամսագիրը արդեն Հայաստանում է: Ս.թ. նոյեմբերի 15-ից վաճառքում է Forbes Հայաստան ամսագրի առաջին համարը և մեկնարկել է www.forbes.am կայքի աշխատանքը:
«Հրավիրում եմ մասնակցելու Forbes Հայաստանի կայացմանը: Սա մեր երկրորդ նախագիծն է Հայաստանում, որի մեկնարկի հիմնական պատճառները՝ մեր թիմի և ընթերցողի նկատմամբ ունեցած հավատն ու վստահությունն են, ու նաև համոզվածությունը, որ Forbes Հայաստանը շատ արագ կդառնա մեր ամսագրային շուկայի առաջատարը»,- Forbes-ի հայաստանյան մեկնարկին նվիրված մամլո ասուլիսին ասաց Forbes Հայաստանի հրատարակիչ և գլխավոր խմբագիր Գագիկ Եզիազարյանը` ավելացնելով, որ վստահ է՝ Forbes-ը կարևոր մեդիա հարթակ կդառնա հայ հասարակության և, մասնավորապես, գործարար միջավայրի խնդիրները արծարծելու և համատեղ լուծումներ փնտրելու համար:
Forbes.am-ի գլխավոր խմբագիր Շուշան Հարությունյանը հույս հայտնեց, որ Forbes-ի ներկայությունը հայաստանյան օն-լայն միջավայրում կնպաստի պրոֆեսիոնալ և էթիկական մեդիա չափանիշների ձևավորմանն ու զարգացմանը: Իսկ «Մեդիա Փարթներս» ընկերության կոմերցիոն տնօրեն Լիանա Ավետյանն էլ նշեց, որ հավատացած է` Forbes-ի աշխատանքները Հայաստանում գովազդատուների համար նոր հնարավորություններ և համագործակցության նոր ասպարեզներ կստեղծեն:
Նշենք, որ Forbes-ը Հայաստանում ներկայացնում է «Մեդիա Փարթներս» ընկերությունը, որը 2011-ից թողարկում է նաև Cosmopoliatan Հայաստան ամսագիրը: Forbes Հայաստանը նախատեսում է ամսագրի տարեկան 12 համարների և www.forbes.am թողարկումը:
Մամլո հաղորդագրություն
