Նա այժմ բուժվում է Երեւանում
Ռուսաստանի Ռոստովի մարզի Վոլգոդոնսկ քաղաքում շինարարական աշխատանքների ժամանակ Տավուշի մարզի սահմանամերձ Կոթի գյուղի բնակիչ, 50-ամյա Աշոտ Հեպինյանը վնասվածք է ստացել: Ազբոշիֆերը ընկել է նրա վրա, դրա հետեւանքով Աշոտը բարձրությունից ընկել է: Նա պարանոցի եւ ողնաշարի շրջանում վնասվածքներ է ստացել, ավելի քան մեկ ամիս բուժում ստացել Վոլգոդոնսկի հիվանդանոցում: Հարազատները համոզված են, որ նրա բուժումն ավելի արդյունավետ կլինի Հայաստանում:
Նոյեմբերյանի բժշկական կենտրոնի տնօրեն Աշոտ Գյոզալյանն ասաց, որ իրենց բժշկական կենտրոնի ռեանոմոբիլով նրան Հայաստան տեղափոխելու համար եղել է ՀՀ առողջապահության նախարարի բանավոր, Տավուշի մարզպետի գրավոր որոշումը, հարազատները հոգացել են տեղափոխման ծախսերը:
Նոյեմբերի 13-ին Նոյեմբերյանից Վոլգոդոնսկ է մեկնել բժշկական խումբ, այն վերադարձել է նոյեմբերի 15-ի երեկոյան: Հաջորդ օրը , կեսօրից հետո Հեպինյանը տեղափոխվել է Երեւանի «Սուրբ Գրիգոր Լուսավորիչ» բժշկական կենտրոն: Աշոտ Գյոզալյանի խոսքերով՝ Ա. Հեպինյանը Երեւանում նյարդաբան բժշկի կողմից պետք է բուժում ստանա:
Ոսկան ՍԱՐԳՍՅԱՆ
