Այսօր «Հայելի» ակումբում Թալինի տարածաշրջանի ջոկատի հրամանատար, «Ազգի փրկություն» կուսակցության նախագահ Սարգիս Կարապետյանը հանդես եկավ կուսակցության փակման մասին հայտարարությամբ:
«2004 թվականին հավաքելով մարտական ընկերներ, մտավորականներ՝ ստեղծեցինք մի ուժ, որ կարողանա հայ ժողովրդին հանել այս վիճակից: Մեր համագումարը որոշել էր Հայաստանում հաստատել արդարություն, այն դարձնել հարուստ երկիր, քանի որ սա հայ ժողովրդի կամքն է»,- ասաց Սարգիս Կարապետյանը՝ շեշտելով, որ ինքը միշտ ազգի փրկության համար կռվել է ու պատերազմի դաշտը երբեք չի լքել:
Սարգիս Կարապետյանի խոսքով` քանի որ իրենց կուսակցությունը չկարողացավ ազգը փրկել, իրենց խանգարեցին իշխանությունները, բանսարկուները եւ հասկանալով, որ մեղքը կուսակցություններինն է, որոնք ստեղծվել են ազգին թալանելու, իշխանություններին հաճոյանալու համար, որոշեցին այլեւս չմնալ, քանի որ դերասան չեն, կաշառվող չեն, քծնող չեն:
«Հայ ժողովրդի համար ներկայիս իշխանությունները մեծ վտանգ են պարունակում: Մենք որոշեցինք լուծարել կուսակցությունը ու հանդես գալ ժողովրդի անունից: Կուսակցություն պահելը մեզ արդեն խանգարում է, քանի որ կուսակցություններն իրենց բարոյալքել են և, հետևաբար, մենք ինչ էլ անենք` ժողովուրդը մեզ չի հավատա: ՀՀԿ կլինի, ՀՅԴ, թե ՕԵԿ, կամ այլ կուսակցություն, դրանք բոլորը ծախվել են ու ժողովրդին խաբում են: Մենք համագումար արեցինք եւ որոշեցինք, որ կուսակցությունը դադարեցնում է իր գործունեությունը»,- հավելեց Սարգիս Կարապետյանը:
Կարդացեք նաև
Եվա ՀԱԿՈԲՅԱՆ
