ԿԳ նախարարության արտաքին կապերի եւ սփյուռքի վարչության պետ Տիգրան Սահակյանը այսօր շարունակվող «Թափանցիկությունը եւ հաշվետվողականությունը՝ ՀՀ ԿԳ նախարարության կարեւոր սկզբունքներ» խորագրով սեմինարի ժամանակ ներկայացրեց իրենց վարչության աշխատանքի սկզբունքները: Ասաց, որ սերտորեն համագործակցում են ՀՀ-ում արտասահմանյան դեսպանատների ու կառույցների հետ: Վարչության պետի տեղեկացմամբ, ավելի քան երեսուն երկրի հետ միջպետական համաձայնագրեր կան, ընթացիկ տարում շուրջ հինգ միջպետական համաձայնագիր եւ հուշագիր է ստորագրվել, վերջինը՝ Հորդանանի հետ: Խոսելով կրթաթոշակային ծրագրերի մասին, պարոն Սահակյանը նշեց, որ դրանք հաճախ լրացուցիչ պարզաբանման կարիք ունեն:
Յուրաքանչյուր քաղաքացի կարող է արտերկրում սովորել անձնական նախաձեռնությամբ, դիվանագիտական կառույցների կողմից հայտարարված մրցույթով, ԿԳ նախարարության հետ իրականացվող միջազգային համաձայնագրերով: Նա հավելեց, որ կրթաթոշակային ծրագրերի հետ կապված բոլոր հայտարարությունները պարտադիր տեղադրվում են ԿԳ նախարարության edu.am կայքում: Սահակյանի խոսքով, ուսանողների կողմից ամենաշատ տրվող հարցերը վերաբերվում են կրթաթոշակային ծրագրերի ֆինանսավորմանը, որոշ երկրների պարագայում ուսուցումն անվճար է, որոշները տրամադրում են կրթաթոշակ եւ հանրակացարան: Օրինակ՝ Չինաստանն ու Ռուսաստանը տրամադրում են եւ՛ անվճար ուսուցում, եւ՛ կրթաթոշակ, եւ՛ կեցության հարցն է ապահովում, Լեհաստանի պարագայում միայն անվճար ուսուցում է առաջարկվում: Ներկայումս Եգիպտոսում եւ Սիրիայում դադարեցվել են կրթաթոշակային ծրագրերը, եկող տարի պայմանավորվածություն կա ուսանողներ ուղարկել Լիտվա:
Ինչ վերաբերում է օտարերկրացիների ընդունելությանը հայաստանյան բուհեր, Տիգրան Սահակյանի ասելով, դա արվում է մատչելի, բայց որակյալ կրթություն սկզբունքով:
Տարեկան 1100-1200 օտարերկրյա ուսանող է սովորում Հայաստանում՝ մասնավորապես Հնդկաստանից, Սիրիա, Ռուսաստանի Դաշնությունից: Արտասահմանցի ուսանողներ կան բոլոր բուհերում շուրջ՝ 20 երկրներից:
Կարդացեք նաև
Երեւանում չինարենի խորացված ուսուցմամբ ավագ դպրոցի ստեղծման ծրագիր կա՝ 103 դպրոցի հիմքի վրա: Նախատեսվում է ռուսերենի, անգլերենի, արաբերենի խորացված ուսուցմամբ ավագ դպրոցներ կառուցել՝ գործընկեր երկրների ներդրումներով, նաեւ Լոմոնոսովի անվան համալսարանի մասնաճյուղ բացել Հայաստանում: Սլավոնական համալսարանը գործունեության նոր պայմանագիր կստորագրի, նրան կտրամադրվի ազգային հետազոտական կարգավիճակ:
Տիգրան Սահակյանը նշեց, որ քննարկման փուլում է համաձայնագիրը, ըստ որի, հայերենը իբրեւ պարտադիր առարկա կուսուցանվի ՌԴ բոլոր հայաշատ վայրերում: ԿԳ նախարարությունը առաջարկում է, որ հայոց լեզու անցնեն երկու հանրակրթական դպրոցում՝ Մոսկվայում, մեկական՝ Սանկտ Պետերբուրգում, Սոչիում, Կրասնոդարում:
Գոհար ՀԱԿՈԲՅԱՆ
