«Անձ եւ պաշտոն» գրքի շնորհանդեսին հոգեբանները վերլուծեցին անձի եւ պաշտոնի համապատասխանության հարցը:
«Ասում են՝ լավագույն աշխատանքը բարձր վարձատրվող հոբին է: Իսկապես, եթե այդպես է, մարդը հաճույքով է գնում աշխատանքի»,- ասաց «Փորձաքննությունների ազգային բյուրոյի» տնօրեն, «Անձ եւ պաշտոն» գրքի հեղինակներից Արտաշես Ջավադյանը: Երեկ «Մարիոթ» հյուրանոցում կայացավ «Անձ եւ պաշտոն» գրքի շնորհանդեսը: Գրքի հեղինակներն են «Փորձաքննությունների ազգային բյուրոյի» տնօրեն Արտաշես Ջավադյանը, հոգեբանական փորձաքննությունների բաժնի պետ Մարինե Պետրոսյանը եւ ԵՊՀ համալսարանի դասախոս, «Փորձաքննությունների ազգային բյուրոյի» գիտական խորհրդի անդամ Դավիթ Ամիրյանը: Ըստ հեղինակների՝ իրենք փորձել են հոգեբանական տեսակետից վերլուծել անձի եւ պաշտոնի համապատասխանության հարցերը, անձնակազմի ընտրության, գնահատման, խրախուսման, անձնակազմին հարմարվելուն վերաբերվող այլ հարցեր: «Մենք առաջին անգամ կիրառության դրեցինք պաշտոնի գնահատման սանդղակը, որի միջոցով շեշտվում են այն մասնագիտական որակները, առանց որի հնարավոր չէ տվյալ պաշտոնը ղեկավարել»,- ասաց գրքի հեղինակներից Մարինե Պետրոսյանը: «Աշխարհի մի շարք երկրներում շատ գործատուներ մշակում են աշխատակիցների խրախուսման տարբեր միջոցներ, որպեսզի բարձրացնեն աշխատանքի արդյունավետությունը: Ընդ որում, նախքան աշխատողին խրախուսելը կատարում են ուսումնասիրություն՝ պարզելու, թե աշխատակիցը կոնկրետ ինչպիսի խրախուսման կարիք ունի»,- ասաց նա:
Գրքի հեղինակները կարեւորեցին նաեւ կոլեկտիվ աշխատանքի գաղափարը: «Առանձին անհատը շատ թույլ է, նման է լքված Ռոբինզոնի: Մարդիկ կարող են արարել, ստեղծել ինչ-որ բան, այսինքն՝ լավ աշխատել, եթե միասին են: Շատ լավ խոսքեր են, պետք է գիտակցել դրանց նշանակությունը»,- իր հանդիսավոր ելույթի ժամանակ ասաց գրքի հեղինակներից Արտաշես Ջավադյանը: Տարիների ընթացքում հեղինակները հետազոտություններին զուգահեռ օգտվել են բազմաքանակ գրականությունից. «Մենք օգտվել ենք նաեւ մեր կառույցին կից գործող Քրեաբանության կիրառական հիմնախնդիրների կենտրոնից, որը ստեղծվել է կառավարության որոշմամբ՝ հանցագործության դեմ պայքարի ծրագրով»,- ասաց Արտաշես Ջավադյանը: Հավելեց. «Տարիների ընթացքում միշտ հիշել ենք Վոլտերի հայտնի խոսքը՝ աշխատանքը մարդուն փրկում է ձանձրույթից, հեռու պահում արատներից, փրկում կարիքներից»:
Ելույթ ունեցան ձեռնարկի խմբագիր Լարիսա Հովհաննիսյանը, մասնագիտական խմբագիր, ճանաչված հոգեբան Ռուբեն Աղուզումցյանը, ՀՀ պետական կառավարման ակադեմիայի ռեկտոր Արսեն Լոքյանը, Ճարտարագիտական գիտությունների դոկտոր, պրոֆեսոր Յուրի Սաֆարյանը եւ այլոք: Վերջինս պատմեց. «Երբ ես երիտասարդ էի, մեր նախարարներից մեկն ասում էր՝ կամ պետք է աշխատանքի ընդունես լավ մասնագետի կամ լավ մարդու: Գիտելիքներից բացի պետք ունենալ մարդկային լավ որակներ»:
Կարդացեք նաև
Ներկա գտնվողներից շատերը շեշտեցին, որ մեր երկրում նմանատիպ գրքի պահանջարկը շատ մեծ է, ոմանք ցանկություն հայտնեցին, որ գիրքն ավելի շատ բազմանա, հետագայում լույս տեսնի նաեւ որպես ուսումնամեթոդական ձեռնարկ:
ՆԱԶԵՆԻ ԲԱՂԴԱՍԱՐՅԱՆ
«Առավոտ» օրաթերթ
