A1plus.am.Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարանը որոշել է վերադարձնել Զարուհի Փոստանջյանի կողմից ներկայացված հայցադիմումը։
Զարուհի Փոստանջյանը հայց էր ներկայացրել դատարան ընդդեմ պատասխանողներ Գալուստ Սահակյանի, Կարեն Ավագյանի, Խաչիկ Ասրյանի, Մհեր Սեդրակյանի, Առաքել Մովսիսյանի` պատվին և արժանապատվությանը պատճառված վնասի հատուցման և հրապարակային ներողություն խնդրելուն պարտավորեցնելու պահանջների մասին:
Դատավորը պարզաբանում է.
ՈՒսումնասիրելով հայցադիմումը և կից փաստաթղթերը` գտնում եմ, որ դրանք ենթակա են վերադարձման` հետևյալ պատճառաբանությամբ:
Համաձայն ՀՀ քաղաքացիական դատավարության օրենսգրքի 88-րդ հոդվածի 1-ին կետի 1-ին ենթակետի հայցադիմումին կցվում է սահմանված կարգով և չափով պետական տուրքի վճարած լինելը հավաստող փաստաթուղթ:
ՀՀ քաղաքացիական դատավարության օրենսգրքի 92-րդ հոդվածի 1-ին կետի 5-րդ ենթակետի համաձայն` դատավորը վերադարձնում է հայցադիմումը, եթե չեն ներկայացվել սահմանված կարգով և չափով պետական տուրքի վճարումը հավաստող փաստաթղթեր, իսկ այն դեպքում, երբ օրենքով նախատեսված է պետական տուրքի վճարումը հետաձգելու կամ տարաժամկետելու կամ դրա չափը նվազեցնելու հնարավորություն` բացակայում է դրա վերաբերյալ միջնորդությունը կամ նման միջնորդությունը մերժվել է:
«Պետական տուրքի մասին» ՀՀ օրենքի 9-րդ հոդվածի 1-ին կետի «ա» ենթակետի համաձայն գույքային պահանջով որպես պետական տուրք պետք է վճարվի հայցագնի երկու տոկոսի չափով, բայց ոչ պակաս բազային տուրքի 150 տոկոսից:
Կարդացեք նաև
Ինչպես պարզվեց հայցադիմումի և կից փաստաթղթերի հետազոտմամբ, հայցվորը խնդրել է համապատասխանողներից յուրաքանչյուրից վիրավորանք հասցնելու համար բռնագանձել 500.000-ական ՀՀ դրամ, մինչդեռ հայցադիմումին կից ներկայացրել է 4000 ՀՀ դրամ պետական տուրքի գումար վճարելու վերաբերյալ անդորրագիր:
Հայցադիմումի և կից փաստաթղթերի հետազոտմամբ պարզվեց, որ հայցվորի կողմից չեն պահպանվել հայցադիմումի ձևին և բովանդակությանն առաջադրվող` օրենքով սահմանված պահանջները, մասնավորապես` հայցադիմումի պատճառաբանական մասում հայցվորը նշել է, որ պատասխանողներից յուրաքանչյուրից պետք է բռնագանձել 5.000.000-ական ՀՀ դրամ` վիրավորանք հասցնելու համար, իսկ խնդրեց մասում նշվել է, որ վիրավորանք հասցնելու և զրպարտելու համար պատասխանողներից յուրաքանչյուրից պետք է բռնագանձել 500.000-ական ՀՀ դրամ, այսինքն հայցվորի կողմից հստակեցված չէ հայցագինը:
Բացի այդ , հայցվորի կողմից չեն ներկայացվել այն հանգամանքները, որոնց վրա հիմնվում են հայցապահանջները և հայցապահանջները հաստատող ապացույցները, այն է` հայցադիմումին կից ներկայացված փաստաթղթերի ցանկում բացակայում են թիվ 3-7 կետերում նշված փաստաթղթերը` (ԶԼՄ հրապարակումներ-խմբ)։
Վերոգրյալների հիման վրա և ղեկավարվելով ՀՀ քաղաքացիական դատավարության օրենսգրքի 144 և 145-րդ հոդվածներով
Ո Ր Ո Շ Ե Ց Ի
Զարուհի Փոստանջյանի կողմից ներկայացված հայցադիմումը և կից փաստաթղթերը վերադարձնել…
ԴԱՏԱՎՈՐ Ա. ՀՈՒՆԱՆՅԱՆ
Հ. Գ. Հիշեցնենք, Զարուհի Փոստանջյանը հայց է ներկայացրել այն բանից հետո, երբ ԵԽԽՎ-ում Սերժ Սարգսյանին կազինոների մասին տված հարցից հետո որոշ հանրապետականներ վիրավորական արտահայտություններ թույլ տվեցին իր հասցեին։
