«Մալիշկայի Արենին» հայկական գինին, այսպես ասած` հաղթել է իտալական, պորտուգալական, իսպանական, վրացական եւ շատ երկրների արտադրած գինիներին` յուրահատուկ համային հատկանիշների եւ փնջի համար: «Մալիշկայի Արենին», որը հնեցված գին է, ոսկե մեդալը ստացել «Սեղանի կարմիր անապակ գինիներ» անվանակարգում, նոյեմբերի 13-15-ին Լեհաստանում անցկացված «Էնոէքսպո 2013» միջազգային համտես-մրցույթում: Այս մասին Aravot.am-ի հետ զրույցում ասաց «Մարան» ընկերության սեփականատեր, գինեգործների միության նախագահ Ավագ Հարությունյանը:
Պարոն Հարությունյանի ներկայացմամբ` Լեհաստանում անցկացված այս մրցույթը համարվում է եվրոպական նման կարգի կարեւորագույն եւ ներկայացուցչական միջոցառումներից մեկը:
«Լեհական «Էնոէքսպո 2013» համտես-մրցույթին մասնակցել են ավելի քան 500 գինիներ աշխարհի բազմաթիվ գինեգործական երկրներից`Իտալիա, Իսպանիա, Ավստրիա, Պորտուգալիա, Հունգարիա, Հունաստան, Սերբիա, Վրաստան, Կանադա, Կիպրոս, Խորվաթիա, Սլովակիա, Չեխիա եւ այլն: Սա Լեհաստանի ներքին շուկային ուղղված ամենակարեւոր մրցույթն է, իր գործունեությամբ այն շատ կարեւոր մրցույթ է. հայկական գինու ռեյտինգը կտրուկ կբարձրանա»,-ասաց պարոն Հարությունյանը, նշելով, որ ընկերությունն այս մրցույթին առաջին անգամ է մասնակցել:
Մինչ այս, ինչպես ասաց պարոն Հարությունյանը, «Բագրատունին» է ոսկե մեդալ ստացել «Խաղողի եւ գինու միջազգային կազմակերպության» (OIV) այս տարի Մոսկվայում անցկացված համաշխարհային մրցույթում`«Սեղանի սպիտակ գինիներ» անվանակարգում:
«OIV»-ին գինեգործական ամենակարեւոր եւ հիմնական կազմակերպությունն է աշխարհում, նստավայրը Փարիզում է: Մոսկվայի մրցույթին էլ մասնակցում էին 28 երկրներից 302 գինիներ, եւ փաստորեն նորից հայկական գինին ոսկե մեդալ է ստացել, այսինքն` հայկական գինին սկսում են ճանաչել Եվրոպայում»:
Նելլի ԲԱԲԱՅԱՆ
