Քիչ առաջ ՀՀԿ գրասենյակի դիմաց «Կուտակային կենսաթոշակների մասին» ՀՀ օրենքի նախագծից բողոքող քաղաքացիները հանդիպեցին ՀՀԿ ներկայացուցիչ Ռազմիկ Թադեւոսյանին: Նրան հանձնեցին օրենքի հիմնախնդիրների քսանհինգ կետերից բաղկացած իրենց մշակած փաստաթուղթը:
«Խոստացավ, որ այդ հարցերը կտրվեն համապատասխան անձանց եւ կլինի քննարկում»,- լրագրողներին ասաց հանդիպման մասնակից Տիգրան Պետրոսյանը: Նա, իր օրինակով ասաց, որ որպես IT ոլորտի աշխատող, որտեղ աշխատավարձերը բարձր են, այդ օրենքն անգամ իրենց ոլորտում է իր բացասական հետեւանքները թողնելու. «Այդ տասը տոկոսը իմ ընտանեկան բյուջեի վրա այնպիսի ազդեցություն կարող է թողնել, որ չկարողանամ իմ երեխայի համար բարեկեցիկ կյանք ապահովել»:
Ռազմիկ Թադեւոսյանն ակտիվիստներին վստահեցրել է, որ իրենք գիտեն օրենքից բխող բոլոր խնդիրների մասին եւ խոստացել է, որ «կփորձեն լուծումներ տալ»:
Ակտիվիստները նաեւ հետաքրքրվել են, թե ինչու է ՀՀԿ-ն այսօր բոյկոտել նիստը, Թադեւոսյանն ասել է՝ «Իրենց խմբակցության ղեկավարը պաշտոնապես հայտարարել է արդեն պատճառը»:
Կարդացեք նաև
ՀՀԿ ներկայացուցիչը ակտիվիստներին խորհուրդ է տվել սպասել անակնկալների:
ՀՀԿ-ի ներկայացուցչի հետ հանդիպումից հետո ցուցարարները որոշեցին հեռանալ, բայց խոստացան, որ կրկին համախմբվելու են ու շարունակեն իրենց պայքարը:
Արփինե ՍԻՄՈՆՅԱՆ
