Այս պահին ՀՀԿ գրասենյակի դիմաց «Կուտակային կենսաթոշակների մասին» ՀՀ օրենքի նախագիծը բոյկոտող հարյուրից ավելի քաղաքացիներ շարունակում են ներկայացնել իրենց պահանջները՝ ՕԵԿ-ականներին եւ ՀՀԿ-ականներին անվանելով վախկոտներ:
«Ասում ենք՝ stop պարտադիր դրամահավաքին: Պահանջում ենք ՀՀԿ-ից գնալ ԱԺ եւ միանալ այսօր ընդդիմադիր չորս քաղաքական ուժերի նախաձեռնած արտահերթ նիստին եւ չբոյկոտել: Պահանջում ենք գնալ եւ բացատրություն տալ»,- ասաց դաշնակցական ակտիվիստ Գերասիմ Վարդանյանը:
Մի ուրիշ ակտիվիստ էլ շարունակեց. «Եկել ենք պահանջելու չբոյկոտել այսօրվա արտահերթ նիստը եւ լսել այն հիմնախնդիրները, որոնք հունվարի մեկից օրենքի կիրառման դեպքում ի հայտ են գալու: Այդ խնդիրների մասին քսանհինգ կետից բաղկացած փաստաթուղթ ենք ներկայացրել»:
Մի ուրիշ ակտիվիստ էլ ներկայացրեց օրենքի բացերը. «Կան հիմնական հարցեր, որոնց պատասխանները չենք ստացել այս ամիսների ընթացքում: Առաջին հարցը վերաբերում է ՝ օրենքի պարտադիր բաղադրիչին, անհասկանալի է, թե ինչու հենց պարտադիր, ոչ ոք այդպես էլ կարծիք չհնչեցրեց, թե որն է այն իրավական հիմքը, որով այդ օրենքը պետք է լինի պարտադիր: Հաջորդ հարցը վերաբերում է թվականին, թե ինչու հենց 1974 թվականից հետո ծնվածները պետք է վճարեն այդ գումարը, ինչու հատկապես հինգ տոկոս, ինչու հաշվի չեն առնվել քաղաքացիների ֆինանսական պարտավորությունները, որոնց առկայության դեպքում մարդիկ չեն կարողանա մուծել իրենց վարկերը, երեխաների ուսման վարձերը: Այս կուտակային կենսաթոշակը իջեցնում է մարդկանց աշխատավարձը ավելի քան վեց ու կես տոկոսով, այսինքն` հարկվում է հարկված աշխատավարձից: Ինչո՞ւ պետք է գործազուրկ քաղաքացին, օրինակ` վաթսուն տարեկան լինելով, երեք տարի սպասի կենսաթոշակային տարիքին, որ ստանա իր գումարը: Եթե դա իրենց սեփականությունն է, ինչու չեն կարող տնօրինել իրենց իսկ գումարը: Քանի մենք չունենք ոչ մի բացատրություն, դիմում ենք կառավարությանը ու ԱԺ-ին՝ հետաձգել այս օրենքը, վերանայել պարտադիր ու մնացյալ կետերը»:
Կարդացեք նաև
Արփինե ՍԻՄՈՆՅԱՆ
