Այսօր խորհրդարանական ճեպազրույցներում «Ժառանգություն» խմբակցության ղեկավար Զարուհի Փոստանջյանը հայտարարեց, որ երեկ երեկոյան իր եւ պատգամավոր Նիկոլ Փաշինյանի մուտքը «Նուբարաշեն» ՔԿՀ, ապօրինաբար թույլ չի տրվել :
Հիշեցնենք, որ անցյալ շաբաթ օրը դարձյալ համանման իրավիճակ էր եղել Նիկոլ Փաշինյանի հետ: Իսկ Արաբկիրի ոստիկանության բաժանմունքի պետը հրաժարվել էր Լեւոն Զուրաբյանի հետ տեսակցելուց:
Այդ առնչությամբ խորհրդարանական քառօրյայի երկրորդ օրը ԱԺ նախագահ Հովիկ Աբրահամյանի մոտ հանդիպում եղավ , որին մասնակցում էին նաեւ վարչապետը, արդարադատության նախարարը, փոխվարչապետ Արմեն Գեւորգյանը եւ խորհրդարանական հանձնաժողովների նախագահները:
Այսօր խորհրդարանական ճեպազրույցներում լրագրողներն անդրադառնալով այդ թեմային՝ պատգամավորներից հետաքրքրվեցին, թե ի՞նչ մոտեցումներ ունեն այս առիթով: ՀԱԿ խմբակցության քարտուղար Արամ Մանուկյանն ասաց. «Դա Հրայր Թովմասյանի կամակորությունն է: Չնայած երեկ խորհրդարանում իրեն շատ լավ էր պահում, ես նրա մոտ մանկական բաներ եմ նկատում»:
Կարդացեք նաև
ԲՀԿ խմբակցության պատգամավոր, ԱԺ մարդու իրավունքների պաշտպանության եւ հանրային հարցերի մշտական հանձնաժողովի նախագահ Էլինար Վարդանյանը խնդիրը դիտարկում է ընդհանրապես օրենքների կիրարկման պրակտիկայի բացակայության մեջ: Իր համար առնվազն տարօրինակ է, որ հարցին այդքան անդրադառնալուց հետո, ինչ-ինչ պատկան մարմիններն այդպիսի ոչ պատշաճ վերաբերմունք են դրսեւորում պատգամավորների նկատմամբ: Նա գտնում է, որ ճիշտ կլինի հարցին լուծում տալ դատական փուլով:
ՀՀԿ խմբակցության ղեկավար Գալուստ Սահակյանն էլ ասաց, որ իրավաբանների վեճի մեջ չի մտնում: «Օրենքն ապահովում է պատգամավորի մուտքը ցանկացած հիմնարկ, եթե դրանք օպերատիվ գործողությունների հետ կապված չեն: Զարուհին ու Նիկոլը պիտի իրանց ուտեի՞ն, կամ էլ հրահանգներ տային…»,- տարակուսեց պատգամավորը`կարծիք հայտնելով, որ պիտի թույլատրեին նրանց մուտքը ՔԿՀ:
Նելլի ԳՐԻԳՈՐՅԱՆ
