«Արտագաղթի, աղքատության բյուջե է եւ որոշ մարդկանց համար խրախճանքի բյուջե է»,- այսօր խորհրդարանական ճեպազրույցներում 2014 թվականի բյուջեի նախագիծը, որը խորհրդարանական քառօրյայում քննարկվող հիմնական թեմաներից էր՝ այսպես բնորոշեց «Ժառանգություն» խմբակցության ղեկավար Զարուհի Փոստանջյանը:
Լրագրողներից մեկի հարցին`հստակեցնել, թե հատկապես ու՞մ համար է բյուջեն խրախճանքի, պատգամավորը հարցով պատասխանեց. «Ի՞նչ է, դուք չգիտե՞ք» ու հավելեց, որ խոսքը շուրջ հազար պաշտոնյաների մասին է, որոնք այդ «խրախճանքների շահառուներն են. կարող ենք թվարկել Սերժ Սարգսյանից սկսած»:
Հինգ բալանոց սանդղակով «Ժառանգությունը» գալիք տարվա բյուջեն զրո է գնահատում: Բանախոսը նկատեց, որ զինծառայողների աշխատավարձերի բարձրացումը, ինչն այդքան շահարկեցին քաղաքական մեծամասնության ներկայացուցիչները, եթե նույնիսկ տասը տոկոսով բարձրանա, միջինը կազմելու է հարյուր հիսուն հազար դրամ, ինչը ոչ մի կերպ չի նպաստելու աղքատության նվազեցմանը:
«Ժառանգությունը» հիսունից ավելի առաջարկ է ներկայացրել բյուջեի շուրջ, բայց տարիների փորձը, դրանց ընդունման առումով, լավատեսություն չի ներշնչում:
Կարդացեք նաև
Նելլի ԳՐԻԳՈՐՅԱՆ
