ԲՀԿ խմբակցության անունից հանդես եկող խմբակցության քարտուղար Նաիրա Զոհրաբյանը հայտարարեց, որ իրենց խմբակցությունը «դեմ» է քվեարկելու 2014 թվականի բյուջեին:
Սակայն մինչ այդ նկատեց, որ տարեց տարի բյուջեի քննարկումները իր մոտ դեժավյուի զգացողություն են առաջացնում՝ «ոչինչ չի փոխվում»: Բայց մի բան այդուհանդերձ, այս տարի փոխվել է, դա կառավարության անկեղծությունն է, որով նրանք խոստովանում են, որ մենք տարածաշրջանի ամենաաղքատ երկիրն ենք, որ ներդրումները նվազել են եւ այլն:
Ի դեպ, տիկին Զոհրաբյանից առաջ ելույթ ունեցած ՀՅԴ խմբակցության պատգամավոր Արծվիկ Մինասյանն էլ էր նշել կառավարության «անկեղծությունը», նկատելով. «Դա հրապարակայնություն չի, դա բացություն չի, թափանցիկություն չի, դա աներեսություն է»: Պարոն Մինասյանն ասել էր, որ նման թերություններ եւ անհաջողություններ գրանցելու դեպքում բնական կլիներ հրաժարական տալը եւ ոչ թե հպարտ-հպարտ ասելը, թե «մենք մեր բացերը հրապարակային ներկայացնում ենք», եւ որեւէ արդյունք չստանալով, տված խոստումները եւ կանխատեսումները չիրականացնելով մնալ իշխանության:
Տիկին Զոհրաբյանը, ի տարբերություն կառավարության անդամների, լուրջ չի ընդունում «Դուինգ բիզնես»-ի չափանիշներով Հայաստանի 32-րդ տեղում գտնվելը, հատկապես, երբ կառավարությունը խոստովանում է, որ ներդրումները 64%-ով նվազել են. «Այո, Հայաստանում հնարավոր է 5 րոպեում բիզնես գրանցել, բայց դրանից հետո սկսվում է հարկային որսը եւ ներդրողները մազապուրծ փախնում են»:
Կարդացեք նաև
ԲՀԿ խմբակցության ղեկավարը նկատեց, որ այս կառավարության եւ նրա ղեկավարի պաշտոնավարման շարունակությունը՝ նման ցուցանիշների պարագայում, որեւէ քաղաքական մոտիվացիա չունի, դա որոշվում է «Մելիք-Ադամյան փողոցում գտնվող փակ ակումբում (նկատի ունի ՀՀԿ գրասենյակը-Մ.Բ.), իսկ թե ինչ մոտիվացիա է հնչում այնտեղ՝ ոչ ոք չգիտի»: Այդուհանդերձ, նա ենթադրեց, որ, հավանաբար, այս կառավարության պաշտոնավարումը շարունակվում է «ի հեճուկս» մոտիվացիայով, եւ ուրեմն. «Եկեք «ինադը» ֆիքսենք որպես կոնստանտ սահմանադրական նորմ, եւ ֆիքսենք, որ նրանք պիտի պաշտոնավարեն հայ ժողովրդի ինադու»:
Մելանյա ԲԱՐՍԵՂՅԱՆ
