Քիչ առաջ «Առավոտի» խմբագրություն զանգահարեց մի երիտասարդ աղջիկ, ով ներկայացավ սկզբից որպես փաստաբան, ապա՝ «անձի ներկայացուցիչ», սկզբից որպես Զարուհի Սարգսյան, ապա որպես Արմինե Սարգսյան: Նա պնդում էր, որ այսօր «Ազդակ» ակումբում կայացած ասուլիսի ժամանակ Սեւակ Հովհաննիսյանի կողմից լրագրողներին բաժանված լուսանկարները ֆոտոշոփ են արված: Լուսանկարներում մայր Աթոռի աշխատակից հայր Հակոբ աբեղա Գրիգորյանն է եւ մի երիտասարդ տղա: Թեեւ այդ լուսանկարները առանձնապես ոչինչ չեն ասում, սակայն ասուլիսի բանախոսը եկեղեցականին մեղադրել է միասեռականության մեջ:
Ավելի ուշ մեզ զանգահարեց հենց հայր Հակոբը, ով ասաց, որ լուսանկարի երիտասարդն իր մորաքրոջ տղան է, եւ այդ լուսանկարներն անհետացել են իր անձնական համակարգչից: Նա նաեւ ասաց, որ իր մորաքրոջ տղան այժմ բանակում է եւ շատ է ազդված այդ լուսանկարների հրապարակումից ու դրանց վերագրվող պատմություններից: Հայր Հակոբն այս պատմության մեջ տեսնում է Լեւոն Մութաֆյանի դերակատարությունը եւ խոստացավ դրան անդրադառնալ հետագայում:
Նա ուղարկել է նաեւ իր պարզաբանումն ու հերքումը Սեւակ Հովհաննիսյանի ասածների կապակցությամբ. «Ինչպես տեղյակ եք վերջին շրջանում ակամա հայտնվեցի որոշ տհաճ քննարկումների կենտրոնում, որոնք բացարձակապես սուտ են, նենգամիտ հերյուրանք ու չեն համապատասխանում իրականությանը և խաթարում են իմ, ընտանիքիս ու հարազատներիս անդորրն ու կյանքի բնականոն ընթացքը: Նկատի ունենալով, որ այդ ամենին վերջ դնելն հնարավոր է միայն դատական կարգով՝ դիմելու եմ դատական գորընթացների, օրենքով սահմանված կարգով անունս ու բարի համբավս վերականգնելու համար: Չուզենալով որպես Եկեղեցու սպասավոր մտնել այդ գործընթացների մեջ, նպատակահարմար եմ համարել դիմել Վեհափառ Հայրապետին առժամապես եկեղեցական իմ գործունեությունը կասեցնելու համար, մինչև հարցի մեջ հստակություն կմտցվի: Միաժամանակ տեղեկացնում եմ որ արդեն իսկ նախնական խորհրդակցություն եմ ունեցել փաստաբանի հետ և առաջիկա օրերին դիմելու եմ դատարան իմ անձի արժանապատվության ու բարի համբավի նկատմամբ ոտնձգություն կատարած անձնավորությանը օրենքի սահմանված կարգով պատասխանատվության ենթարկելու համար»:
Հայր Հակոբն ասաց, որ վաղը ասուլիս է տալու եւ մանրամասն պարզաբանելու է հարցը: Անսալով հայր Հակոբի խնդրանքին՝ հեռացնում ենք այդ լուսանկարները կայքից:
Կարդացեք նաև
Մելանյա ԲԱՐՍԵՂՅԱՆ
