Պարույր Հայրիկյան ներկայացրեց հարցման արդյունքները. Ժողովուրդը դեմ է Մաքսային միությանը

Այսօր ԱԻՄ առաջնորդ Պարույր Հայրիկյանը «Հայելի» ակումբում խոսեց Մաքսային միության վերաբերյալ իր կազմակերպած հարցման մասին, ներկայացնելով տվյալներ: 
Պարույր Հայրիկյանի խոսքով` սխալներ թույլ չտալու համար պետք է փորձել շրջահայաց լինել, կամ էլ` սխալվի նա, ով կրելու է դրա արդյունքները: Ըստ նրա, երբ ժողովուրդն է սխալվում` նա կարող է իր սխալն ուղղել, իսկ երբ քաղաքական գործիչն է ժողովրդի համար սխալվում`դա աններելի է:
«Մեկ օրվա մեջ եվրոպական կողմնորոշում ունեցող մեր իշխանավորները որոշեցին գնալ դեպի Մաքսային միություն, բոլորը ձգտում էին դառնալ դեպի եվրոպական ու չէին ուզում դառնալ Լուկաշենկոյի կամ Նազարբաեւի կուսակցության անդամ, մեկ էլ հանկարծ նախագահն այդ հայտարարությունն արեց: Քանի որ հարցը վերաբերվում է ժողովրդին, պատվիրեցինք հարցում կատարել, տեսնելու համար ժողովրդի կարծիքը, եւ ասեմ, որ ես անձամբ սոցիոլոգիայով զբաղվել եմ շուրջ 40 տարի: Հարցումներով մշտապես ենք առաջնորդվել, այս մեկն էլ իրականացնելիս ստացանք բավականին անսպասելի արդյունքներ»:
Պարույր Հայրիկյանը տեղեկացրեց, որ հարցումները սկսվել էին տասը օր առաջ, ավարտվել երեկ: Հարցաթերթիկն անանուն է եղել: Ստացվել է հետեւյալ պատկերը.
Հարցումներին մասնակցել է 1284 հոգի: Ըստ հարցման արդյունքների`չի կողմնորոշվել բնակչության 26,87 տոկոսը: Ոչ մեկին կողմ չէ հարցվածների 22,12 տոկոսը: Մաքսային միությանը կողմ է 22,98 տոկոսը: Եվրոպական միությանը կողմ է հարցվածների 28,03 տոկոսը:
Պարույր Հայրիկյանը ավելացրեց, որ եթե հանում ենք չկողմնորոշվածներին` ստացվում է, որ Մաքսային միությանը ձայն է տալիս 30 տոկոսը, իսկ Եվրոպական միությանը` 38 տոկոսը:
Երեւանի կենտրոնում իրականացված հարցումներից էլ պարզ է դարձել, որ Մաքսային միությանը կողմ է ընդամենը 7 տոկոսը:
Պարույր Հայրիկյանը գտնում է, որ պետք է կոչ անել հանրությանը դուրս գալ փողոց «Ոչ Մաքսային միությանը» կոչով:

Եվա ՀԱԿՈԲԱՆ