Օնլայն ծովահենության դեմ պայքարող եւ դրա մոնիթորինգով զբաղվող MUSO ընկերության կողմից կատարված հետազոտությունը բացահայտել է, որ The Beatles-ը հանդիսանում է մոլորակի ամենից մեծ քանակությամբ անօրինականորեն ներբեռնվող խումբը:
MUSO ընկերությունը ծառայություններ է մատուցում անկախ երաժշտական լեյբլներին, որոնց թվում են Beggars Group-ը, Demon Music Group-ը եւ Essential Music & Marketing-ը՝ ֆայլափոխանակման կայքերի մոնիթորինգ իրականացնելով եւ անօրինական ֆայլերը հեռացնելու վերաբերյալ դիմումներ կազմելով:
Ֆայլափոխանակման կայքերի՝ վերջերս կատարած մոնիթորինգի արդյունքում MUSO-ն հայտնաբերել է «Լիվերպուլյան քառյակին» վերաբերող ընդհանուր առմամբ 187697 ֆայլ: Այս չափանիշով խումբն առաջին տեղում է՝ գրեթե 115000 ֆայլով գերազանցելով երկրորդ տեղում գտնվող Fleetwood Mac խմբին, որին վերաբերող 72984 ֆայլ է հայտնաբերվել: Բոբ Մարլին, Led Zeppelin-ը եւ բրիտանացի երգիչ Քլիֆ Ռիչարդը եզրափակում են առաջին հնգյակը:
Նշենք, որ The Beatles-ը բավականին ուշ հայտնվեց երաժշտական թվային շուկայում: Խմբի երաժշտական կատալոգը հայտնվեց iTunes-ում միայն 2010-ին: Այն ժամանակ Apple-ի ղեկավար Սթիվ Ջոբսն ուրախությամբ նշել էր. «Մենք սիրում ենք The Beatles-ը եւ հպարտ ու ոգեւորված ենք՝ նրանց iTunes-ում ողջունելու: Այստեղ հասնելը երկար ու ձիգ ճանապարհ էր: Ի շնորհիվ The Beatles-ի եւ EMI-ի, մենք այսօր իրականացնում ենք մի երազանք, որ ունեինք 10 տարի առաջ iTunes-ը գործարկելուց ի վեր»: «Բիթլների» հարվածահար Ռինգո Սթարն էլ այդ կապակցությամբ ասել էր. «Ես հատկապես ուրախ եմ, որ այլեւս ստիպված չեմ լինի պատասխանել հարցին, թե երբ The Beatles-ը կհայտնվի iTunes-ում: Վերջապես, եթե դուք ցանկանում եք, դուք կարող եք այն ունենալ»:
MUSO ընկերությունը նշում է, որ յուրաքանչյուր ֆայլը, հավանաբար, կարող է ներբեռնված լինել մոտավորապես 1000 անգամ: Հետեւելով այդ հաշվարկին՝ The Beatles-ին վերաբերող ֆայլերի ներբեռնումների քանակը կազմում է տարեկան մոտ 190 միլիոն անգամ:
Ամենից շատ անօրինականորեն ներբեռնվող երաժիշտների առաջին տասնյակը հետեւյալ տեսքն ունի.
1. The Beatles – 187687 ֆայլ
2. Fleetwood Mac – 72984 ֆայլ
3. Bob Marley – 60024 ֆայլ
4. Led Zeppelin – 59011 ֆայլ
5. Cliff Richard – 56576 ֆայլ
6. Stevie Wonder – 45496 ֆայլ
7. Jimi Hendrix – 44093 ֆայլ
8. Elvis Presley – 40794 ֆայլ
9. ABBA – 35193 ֆայլ
10. Rolling Stones – 34444 ֆայլ:
Այնուամենայնիվ, The Beatles-ը բավականին մեծ գումարներ է ստանում իրենց երաժշտության օրինական վաճառքի արդյունքում: 2010-ին iTunes-ում հայտնվելուց հետո ընդամենը առաջին մեկ շաբաթվա ընթացքում վաճառվեց 450000 The Beatles-ի թվային ալբոմ եւ 2 միլիոն առանձին երգ:
Հայկական ռոք ասոցիացիա
«Առավոտ» օրաթերթ
