«Ամերիկայի Ձայն». Էներգետիկայի միջազգային կազմակերպության համաձայն, Միացյալ Նահանգները մինչև 2016 թվականը կարող է առաջ անցնել Սաուդյան Արաբիայից և Ռուսաստանից որպես նավթի ամենախոշոր արդյունահանող
Էներգետիկայի միջազգային կազմակերպության համաձայն, Միացյալ Նահանգները մինչև 2016 թվականը կարող է առաջ անցնել Սաուդյան Արաբիայից և Ռուսաստանից որպես նավթի ամենախոշոր արդյունահանող և հասնել երկու տասնամյակից էներգետիկայի առումով ինքնաբավ երկրի կարգավիճակի:
Կազմակերպությունը երեքշաբթի օրը տեղեկացրել է, որ գալիք տասը տարվա ընթացքում Հյուսիսային Դակոտա և Տեխաս նահանգներում թերթաքարային նավթի արդյունահանման աշխատանքների հաջողությունը կնվազեցնի Նավթ արտահանող երկրների կազմակերպության՝ որպես աշխարհում նավթի ամենաակնառու արդյունահանողի դերը, որտեղ մերձավորարևելյան պետությունները գերիշխող դիրք են զբաղեցնում:
«Համաշխարհային էներգետիկայի զարգացման հեռանկարներ» զեկույցում Էներգետիկայի միջազգային կազմակերպությունը նշել է, որ Միացյալ Նահանգները մինչև 2035 թվականը կհասնի էներգետիկ իր բոլոր պահանջները երկրի ներսում ստեղծվող ռեսուրսների միջոցով բավարարելու կարողության:
Կարդացեք նաև
Փարիզից իր գործունեությունն իրականացնող Էներգետիկայի միջազգային կազմակերպությունը սակայն զգուշացրել է, որ որպես աշխարհում նավթի ամենախոշոր արդյունահանողի Միացյալ Նահանգների դիրքը կպահպանի մինչև 2020-ական թվականների կեսը՝ ներկայում մշակվող նավթահանքերի սպառման պատճառով, ինչից հետո աշխարհում նավթի սպառման հետզհետե աճող ծավալները կծածկվեն մերձավորարևելյան երկրներում արդյունահանվող նավթի միջոցով:
Ինչ վերաբերվում է նավթի համաշխարհային պահանջարկին, ապա կազմակերպությունը նշել է, որ այն կշարունակվի աճել՝ հիմնականում անցումային տնտեսությամբ երկրներում պահանջարկի բարձրացման շնորհիվ:
Ըստ Էներգետիկայի միջազգային կազմակերպության, որպես աշխարհում նավթի ամենախոշոր սպառող Չինաստանը մինչև 2030 թվականը կանցնի Միացյալ Նահանգներից:
Էներգետիկայի միջազգային կազմակերպությունն իր զեկույցում նշել է նաև, որ աշխարհում էներգետիկ անվտանգությունը հարցականի տակ են դնում նավթի բարձր գները, որոնք 2011 թվականից պահպանվում են մեկ տակառի դիմաց 110 դոլարը գերազանցող մակարդակի վրա: Կազմակերպությունը սակայն կանխատեսում է, որ մինչև 2035 թվականը նավթի գինը կհասնի մեկ տակառի դիմաց 128 դոլարի:
Արմեն Հովհաննիսյան
