«Ես ուզում եմ հասկանալ` ունե՞ք նոր փաստարկներ, որ կրկին այս օրինագիծը քննարկվում է: Եթե՝ ոչ, ապա ես պետք է անեմ մեկ հետևություն, որ ընդամենը աշխարհին փորձում եք ցույց տալ, թե ՀՀ ԱԺ-ն դեմ է Արցախի անկախությանը: Եվ դուք ակտիվանում եք հենց այն ժամանակ, երբ այս պահին, օրինակ, Ադրբեջանի նախագահը քննարկումներ է ունենում Թուրքիայում նախագահի և վարչապետի հետ»,- այսօր խորհրդարանում «Ժառանգություն» խմբակցության ղեկավար Զարուհի Փոստանջյանին նման հարց ուղղեց ՀՀԿ խմբակցության քարտուղար Հովհաննես Սահակյանը:
Հիշեցնենք, որ այսօր խորհրդարանում քննարկվում էր «Լեռնային Ղարաբաղի Հանրապետությունը ճանաչելու մասին» Զարուհի Փոստանջյանի հեղինակած նախագիծը: ՀՀԿ պատգամավորն ասաց, որ հակված է մտածելու, որ այդ նոր փաստարկները կան, ուստի հույս ունի, որ Փոստանջյանը դրանք կներկայացնի խորհրդարանի ամբիոնից: Իր պատասխանում, սակայն, Զարուհի Փոստանջյանը որեւէ նոր բան չասաց: Կրկնեց այն ամենն, ինչ ասել էր իր սկզբնական խոսքում: Դա էլ հիմք տվեց ՀՀԿ խմբակցության մեկ այլ անդամի` Խոսրով Հարությունյանին, քննադատել բանախոսին` անընդհատ նույն բանն ասելու համար:
«Իհարկե կան փաստարկներ, դրանց դուք ինքներդ ծանոթ եք. մենք կանգնած ենք բազմաթիվ մարտահրավերների առջև, և տարածաշրջանում տեղի է ունենում քարտեզի դեֆորմացիա: Տվյալ պարագայում մենք պետք է ունենանք միասնական դիրքորոշում երկու հանրապետությունների կողմից` Արցախի և Հայաստանի Հանրապետության»,- իր պատասխանում ասաց Փոստանջյանը, որից հետո, ըստ էության փոփոխելով նախադասության կառուցվածքը, հավելեց. «Մեր պատմական հայրենիքի, 42 հազար ք/կմ գոյացած այդ երկու հանրապետությունները պետք է ունենան միասնական կարծիք բոլոր մարտահրավերների համար, որոնք մեր առջև ծառացած են»:
Հովհաննես Սահակյանն այլեւս չշարունակեց իր մեկնաբանությունները, քանի որ, ըստ նրա, ինքն այդպես էլ չստացավ իր հարցի պատասխանը:
Նելլի ԳՐԻԳՈՐՅԱՆ
