Երբ մրցավար Աշոտ Վարդապետյանը վարի Վիշվանաթան Անանդի և Մագնուս Կառլսենի նոյեմբերի 9-ին Հնդկաստանում կայանալիք շախմատային հանդիպումը, նա շնորհակալ կլինի իր հայրենակից ԼևոնԱրոնյանից, որ Լոնդոնում չհաղթեց հավակնորդների մրցաշարում: Եթե հաղթած լիներ, 58-ամյա Վարդապետյանը չէր կարող վարել աշխարհի գահի համար այս մրցամարտը: Գրում է «Թայմս օֆ Ինդիա» թերթը:
«Աշխարհի չեմպիոնության խաղերը միակ շախմատային մրցաշարը չէ: Եթե Արոնյանին հաջողվեր այստեղ խաղալ, ես այլ մրցաշար կվարեի», – ասել է Վարդապետյանը թերթին:
Վարդապետյանն արդեն 35 տարի է շախմատային խաղեր է վարում: Նա մրցավար է եղել բոլոր կարևոր առաջնություններում՝ աշխարհի գավաթի, բաց առաջնություններում, շախմատի օլիմպիադաներում, ինչպես նաև վարել է Բորիս Գելֆանդի և Անանդի միջև կայացած նախորդ չեմպիոնության մրցաշարը:
«Ես պարզապես հետևում եմ շախմատի կանոններին», – ասել է Վարդապետյանը, և պատասխանելով թերթի հարցին, թե ինչպես է նախապատրաստվում խաղերին, ասել է. «Լավ քնելով»:
Կարդացեք նաև
Խոսելով շախմատի և այլ մարզաձևերի մրցավարների տարբերությունից՝ նա նշել է, որ շախմատի մրացավարն իրավունք ունի խաղի կանոններում փոփոխություններ անելու առաջարկություններներ կայացնել: Օրինակ, Վարդապետյանին դուր չի գալիս, թե ինչպես է կարգավորվում ժամանակը. Խաղացողն առաջին 40 քայլը պետք է անի երկու ժամվա ընթացքում, հաջորդ 20-ը մեկ ժամում, մնացած քայլերը մեկուկես ժամում. «Մենք պետք է ժամանակի ստանդարտ կարգավորում ունենանք… Ես գրել եմ դրա մասին ՖԻԴԵ-ին: Յուրաքանչյուր ժամանակաշրջան ժամանակի իր կարգավորումն է սահմանում»:
Պատրաստեց Հովհաննես ԻՇԽԱՆՅԱՆԸ
