Մաշտոցի պողոտայում նոյեմբերի 5-ին տեղի ունեցած միջադեպի հետեւանքով 20 ձերբակալվածներից, 10-ից մեկը, ում նկատմամբ երեկ մեղադրանք է առաջադրվել, ակտիվիստ Ավետիս Ավետիսյանն էր:
Ավետիսի փաստաբան Անդրանիկ Աբաջյանը Aravot.am-ին ասաց, որ մեղադրանք է առաջադրվել Քրեական օրենսգրքի 316 հոդվածով՝ իշխանության ներկայացուցչի նկատմամբ բռնություն գործադրելու համար:
Փաստաբանից հետաքրքրվեցինք՝ բերման ենթարկելու ճանապարհին բռնություններ կիրառե՞լ են իր պաշտպանյալի նկատմամբ: «Հիմնավորում չունեմ, առաջինը այդ հարցն եմ տվել: Նա ասաց՝ ոչ, նման բան չի եղել: Վերաբերմունքը հայկական ոճով է եղել, սիրալիր վերաբերմունք ակնկալել հնարավոր էլ չէր»:
Ավետիսը ավելի վաղ հայտարարել էր, որ հացադուլ է հայտարարելու, փաստաբանը, սակայն, այդ մասին տեղեկություն չունի. «Չեմ կարող ասել: Իր որոշելիքն է, ես իրեն ասել եմ, որ օրենքի սահմաններում, եթե ասելիք ունես, որ կարող ենք այդ հարցով պահանջատեր լինենք, ասա: Բայց իրեն խորհուրդ տամ կամ արգելեմ, դա բացառվում է»:
Կարդացեք նաև
Պարոն Աբաջյանը դեռ չի շտապում ասել, թե ինչքանով է արժանահավատ առաջադրված մեղադրանքը. «Որպես փաստաբան, պետք է, բնականաբար, ասեմ, որ անմեղ է: Իսկ որպես Հայաստանի քաղաքացի, ոչ մի բան չեմ կարող ասել: Քննությունը ցույց կտա՝ ինքը անմե՞ղ է, թե՝ ոչ: Ներկա պահին մենք նաեւ հրաժարվել ենք նման հայտարարություններ անելուց: Ներկա պահին ձեռնպահ եմ մնում պատասխան տալուց»:
Արփինե ՍԻՄՈՆՅԱՆ
