Ճարտարապետ ՀՐԱՉ ՊՈՂՈՍՅԱՆԻ կարծիքով` ի տարբերություն գրողների եւ կոմպոզիտորների, Ճարտարապետների միության համագումարն իր թեժությամբ չի փայլի: «Կարծում եմ` ամեն ինչ հանդարտ կընթանա ու կրկին կընտրվի Մկրտիչ Մինասյանը»,- մեզ հետ զրույցում ասաց նա:
Ըստ ճարտարապետի` միությունները դարձել են անօգուտ, անհասկանալի կառույցներ: Չունեն որեւէ խնդիր լուծելու լծակներ, չունեն գումարներ, չունեն դերակատարություն: Այդ պատճառով որեւէ հետաքրքրություն չի դրսեւորվում նրանց նկատմամբ: Չկա հետաքրքրություն, չկա նաեւ պայքար: Հենց այս հանգամանքով է ճարտարապետը պայմանավորում առաջիկա համագումարի հանդարտ ընթացքը։
Ճարտարապետ ՍԱՇՈՒՐ ՔԱԼԱՇՅԱՆԸ եւս այն կարծիքին է, որ միության համագումարն առանձնապես չի փայլի թեժությամբ: «Ճարտարապետների շրջանում հարաբերությունների սրացում չկա: Ենթադրում եմ, որ գրողների ու կոմպոզիտորների դեպքում թեժ մթնոլորտը կապված էր անձնական խնդիրների հետ»:
Սաշուր Քալաշյանի խոսքով` Ճարտարապետների միությունում եւս կան խնդիրներ, բայց դրանք անձնական բնույթ չունեն: «Բազմիցս փորձել ենք փոփոխություն կատարել մեր օրենսդրական դաշտում, ինչն անդրադարձ կկատարի միության գործունեության վրա: Բայց կառավարությունը բարյացակամ չէ մեր նախաձեռնության նկատմամբ: Ոչ մի ատյանում չեն հասկանում օրենսդրական դաշտի փոփոխության կարեւորությունը, եթե հասկանում էլ են` խուսափում են հարցի լուծումից»,- ասաց Սաշուր Քալաշյանը:
Ըստ ճարտարապետի` իրենց ցանկությունն է օրենսդրորեն բարձրացնել ճարտարապետի մասնագիտության դերն ու նշանակությունը. «Մենք կարծում ենք, որ ճարտարապետների որակավորման հարցը պետք է Ճարտարապետների միությունը լուծի: Հիմա այդ հարցը իբր քաղաքաշինության նախարարությունն է լուծում, բայց դա լուծում չէ: Գումարը վճարում են, դիպլոմը վերցնում, լիցենզիան ստանում ու… վերջ: Մինչդեռ պետք է որակավորման քննություն անցկացվի: Իսկ քննության հարցը չի բարձրացվում, քանի որ ձեռնտու չէ: Ձեռնտու է ճարտարապետի դիպլոմով մի կամակատար ունենալ, որը կկատարի բոլոր հրամանները»։
Լիլիթ ՀՈՎՀԱՆՆԻՍՅԱՆ
Հոդվածն ամբողջությամբ՝ «Հայոց աշխարհ» թերթի այսօրվա համարում
