Նախկին քաղբանտարկյալ Վարդան Մալխասյանի տպավորությամբ, Հայաստանի իշխանությունները ժողովրդին իրենց ստրուկի պես են վերաբերվում:
«Նրանք իրենց անհասկանալի հակահայ քայլերով ապացուցում են, որ դարձել են այս ժողովրդի կատարյալ թշնամիները: Չկա արդեն պետություն, ծաղրանկար է ժողովուրդն արդեն: Այս ծաղրանկարի պայմաններում ենք տասնհինգ տարի շարունակ, երկիրը կառավարում են խաբելով: Համատարած թշնամության, աղքատության, արտագաղթի մեջ, երբ կողոպտել են մեր ազգային ընդերքն ու հարստությունները կրկնակի բարձրացնում են իրենց աշխատավարձերը, գործազուրկներին զրկելով փոքրիկ նպաստներից: Այս ֆոնի վրա այսպիսի քայլերով նրանք ապացուցում են, որ այս ժողովրդի հետ կապ չունեն: Նրանց համար նշանակություն չունի ժողովրդի վիճակը, հասարակական կարծիքը: Մեր համբերության բաժակը լցվել է, սրանք մտածում են, որ ժողովուրդը իրենց ստրուկն է եւ ինչպես ուզեն՝ կվարվեն նրանց հետ: Ժողովրդի մի զգալի հատվածն էլ համակերխվել է»,- այսօր Ազատության հրապարակում ասաց պարոն Մալխասյանը:
Բայց նրան հուսադրում է, որ Հայաստանում դեռ կան մարդիկ, որոնք ազատ ու արժանապատիվ ապրելու համար պատրաստ են պայքարել մինչեւ վերջ. «Այդ տեսակի առաքելություն է պայքարել, կռվել մինչեւ վերջ ու հաղթել: Այդ տեսակի անկոտրում հոգին մղելու է մեզ անզիջում պայքարի: Ամբոխը կամ ստրուկը շատ վտանգավոր են: Մենք մեր հաղթական գործը գլուխ պետք է բերենք գիտակից, ազատ մարդկանցով: Այդ մարդիկ գիտեն, որ ազատությունից ու ճշմարտությունից թանկ բան աշխարհում գոյություն չունի: Նրանք ունեն գաղափար, սկզբունք, չեն վաճառվում, գիտեն, որ ամեն ինչ կախված է մեկ մարդուց, իսկ այդ մեկ մարդը ինքն է, որ կա»:
Հետո էլ դժգոհեց, որ թափթփուկն է տիրում երկրին. «Մեզ իշխում են լիսկաներն ու Վարդան Այվազյանները: Մեր գերխնդիրն է օր առաջ պաշտոնանկ անել այս իշխանություններին»:
Կարդացեք նաև
Պարոն Մալխասյանը հետո անցավ հայ ժողովրդի առջեւ դրված գերխնդիրներին. «Իշխանությունը բանդայի ձեռքից վերցնել եւ վերադարձնել ժողովրդին: Բայց առանց գիտակից ժողովրդի հնարավոր չէ տապալել չարիքի այս վարչախումբը: Այս հրապարակը պետք է լեփլեցուն լինի ազատ ապրելու համար պայքարող գիտակից մարդկանցով»: Վերջում էլ հրահանգեց՝ հաջորդ հավաքին ներկա գտնվողները իրենց հետ առնվազն չորս հոգի բերեն:
Արփինե ՍԻՄՈՆՅԱՆ
