Երեկ գրել էինք, որ Շանթ Հարությունյանը, ով մայրական կողմից Կապանի տարածաշրջանի Եղվարդ գյուղից է, Արցախյան գոյամարտի տարիներին իր ուրույն մասնակցությունն է ունեցել Կապանի տարածաշրջանի պաշտպանական գործողություններին: Մեր անդրադարձից հետո եղան դժգոհողներ, որ Շանթ Հարությունյանի վերաբերյալ հնչեցված ինֆորմացիան կեղծ է, նա առանձնապես մասնակցություն չի ունեցել մարտական գործողություններին եւ ոչ էլ մեծարման արժանի մարդ է:
Փորձեցինք Շանթ Հարությունյանի կապանցի ընկերոջից ճշտել, իրականում ինչո՞վ էր զբաղվում Շանթ Հարությունյանը, արդյոք մասնակցե՞լ է մարտական գործողություններին, թե՞ ոչ: Կապանի պետական բժշկական քոլեջի տնօրեն Ռոմա Սարգսյանը մեզ հետ ունեցած զրույցում նշեց, որ Շանթ Հարությունյանի հետ ինքը ծանոթացել է պատերազմի տարիներին, երբ բժշկական ծառայություններ իրականացնելու նպատակով մեկնել էր սահմանային դիրքեր:
«Շանթ Հարությունյանն էր իր ջոկատով Կապանի տարածաշրջանի Ագարակ ու Եղվարդ գյուղերի տարածքային ինքնապաշտպանությունն իրականացնում, ընկերների հետ էր եկել եւ իրենց հետ բերած զենքով էլ պաշտպանում էին դիրքերը: Ես նրա հետ այնտեղ եմ ծանոթացել, այնտեղից էլ ընկերացանք եւ մինչեւ օրս Շանթն իմ ընկերն է: Սուտ են ասում, որ նա մասնակցություն չի ունեցել, ինչպե՞ս կարելի է մարդու արածը ջուրը լցնել: Ի վերջո նա պաշտպանության կոմիտեի առաջին անդամներից է եղել՝ Աշոտ Նավասարդյանի եւ մյուսների հետ միասին», -ասաց պարոն Սարգսյանը, ով նաեւ ՀՀԿ անդամ է:
Նրա խոսքով՝ Շանթ Հարությունյանն էմոցիոնալ-զգացմունքային է, անարդարությունը չհանդուրժող եւ հայրենիքին նվիրված մարդ է:
Կարդացեք նաև
«Խիստ հայրենասեր անձնավորություն է, իր ընտանիքը՝ պապերից սկսած, նվիրվել է այս հող ու ջրին: Լավ մարդ է, լավ ընկեր, բայց էմոցիոնալ է: Կարող է նստեինք, միասին օր անցկացնեինք, մեկ էլ կռիվ անեինք իրար հետ ու օրերով չխոսեինք, հետո մի քանի օր անց նորից սկսեինք քննարկել: Ինքն ունի այդ էմոցիան…:
Բայց երբ ազգը նեղ իրավիճակում է՝ անպայման նրա կողքին է լինում: Հարկ լինի՝ կգնա սահմանը կպաշտպանի կամ ժողովրդի կողքին կկանգնի», – ասաց Ռոմա Սարգսյանը:
Մերի ՍՈՂՈՄՈՆՅԱՆ
