ՀՀ մշակույթի նախարարության աջակցությամբ, «Նավասարդյան խաղերի կոմիտեն»՝ ս. թ. նոյեմբերի 4-ից անցկացնում է Առաջին «Նավասարդյան խաղերի» աշնանային մրցաշրջանը:
«Նավասարդյան խաղերը» ներառված են նաև «Գյումրին՝ 2013 թ. ԱՊՀ մշակութային մայրաքաղաք» ծրագրի շրջանակներում:
«Նավասարդյան խաղերը» Հայաստանի ազգային հարուստ ավանդույթների և մերօրյա մշակույթի միջև յուրօրինակ մի կամուրջ է. նախաձեռնություն, որը միտված է բացահայտելու և աջակցելու շնորհալի պատանիներին և երիտասարդներին, ինչպես նաև նպաստելու նոր սերնդի ներգրավվածությանը արվեստի տարբեր ոլորտներում: «Նավասարդյան խաղերի» նպատակն է ազգային մշակութային ավանդույթների պահպանումն ու այն սերունդներին փոխանցելու շարունակականություն ապահովումը:
Առաջին «Նավասարդյան խաղերում» ընդգրկված է 36 անվանակարգ, որոնք ներկայացնում են ավանդական և արդի արվեստի, արհեստների գրեթե բոլոր ոլորտները: Խաղերը կիրականացվեն փուլային սկզբունքով, տարվա եղանակներին համահունչ /աշուն, ձմեռ գարուն, ամառ/:
Խաղերը մեկնարկել են ս. թ. նոյեմբերի 4-ին, «Առնո Բաբաջանյան» համերգասրահում «Փողային գործիքներ» անվանակարգի մրցութային առաջին փուլով: Խաղերի աշնանային մրցաշրջանն իրականացվում է 12 անվանակարգում. «Փողային գործիքներ», «Ժողովրդական նվագարաններ», «Էստրադային երգեցողություն», «Ժողովրդական պար», «Մնջախաղ» /անցկացման վայրը՝ Առնո Բաբաջանյան» համերգասրահ/, «Կերպարվեստ» /անցկացման վայրը՝ Խ. Աբովյանի անվան հայկական պետական մանկավարժական համալսարան/, «Ժողովրդական և դեկորատիվ կիրառական արվեստ», «Ասմունք» /անցկացման վայրը՝ ք. Գյումրի, Ա. Շիշյանի անվան «Օկտետ» թիվ 6 երաժշտական դպրոց/ «Կրկեսային արվեստ» /անցկացման վայրը՝ Նոր Նորքի հայորդաց տուն/, «Հագուստի դիզայն» /անցկացման վայրը՝ Երևանի Գեղարվեստի պետական ակադեմիա/, «Ակադեմիական երգեցողություն» /անցկացման վայրը՝ Երևանի Կոմիտասի անվան պետական կոնսերվատորիա/, «Դասական պար» / անցկացման վայրը՝ Երևանի պարարվեստի պետական քոլեջ/:
Վերոնշյալ անվանակարգերում ստացվել է 310 մասնակցության հայտ՝ Երևանից, ՀՀ 7 մարզերից և ԼՂՀ -ից:
«Նավասարդյան խաղերը» կանցկացվեն մրցութային երկու փուլով, երկու տարիքային խմբում՝ կրտսեր և ավագ: Մասնակիցների նվազագույն տարիքը 10 տարեկանն է, առավելագույնը՝ 25:
«Նավասարդյան խաղերի» յուրաքանչյուր անվանակարգի համար ձևավորվել է մրցութային հանձնաժողով, որոնց կազմում ընդգրկված են հանրապետության լավագույն մասնագետները:
Աշնանային խաղերի մրցանակաբաշխության արարողությունը տեղի կունենա Գյումրիում, Վ. Աճեմյանի անվան պետական դրամատիկական թատրոնում, դեկտեմբերին: Այնուհետև, Երևանում, դեկտեմբերի 28-ին, Ալ. Սպենդիարյանի անվան օպերայի և բալետի ազգային ակադեմիական թատրոնում մրցանակակիրների մասնակցությամբ տեղի կունենա «Նավասարդյան խաղերի» թատերահամերգային բեմականացումը, որով և կազդարարվի աշնանային մրցաշրջանի փակումը և ձմեռային մրցաշրջանի բացումը:
Ս. թ. նոյեմբերի 7-ին, ժամը 11:00-ին, «Առնո Բաբաջանյան» համերգասրահում Առաջին «Նավասարդյան խաղերին» նվիրված մամուլի ասուլիսին մասնակցում էին «Նավասարդյան խաղերի կոմիտեի» նախագահ, ՀՀ ժողովրդական արտիստ Բարսեղ Թումանյանը, ՀՀ մշակույթի նախարարության աշխատակազմի ժամանակակից արվեստի վարչության գլխավոր մասնագետ Լիլիա Նիկոյանը:
