Նոյեմբերի 9-ին Չեննայում մեկնարկում է շախմատի աշխարհի թագի համար գործող չեմպիոն, հնդիկ գրոսմայստեր Վիշվանաթան Անանդի եւ հավակնորդ, նորվեգացի Մագնուս Կարլսենի միջեւ մրցամարտը:
Մեկնարկից երկու օր առաջ Կարլսենի մենեջեր Էսպեն Ագդեստեյնը «Thehindu.com»-ին տված հարցազրույցում խոսել է իր պարտականությունների եւ հավակնորդի նախասիրությունների ու բնավորության մասին: «Իմ խնդիրը Մագնուսին ընդհանուր թոհուբոհից հեռու պահելն է, որպեսզի նա կարողանա ամբողջովին կենտրոնանալ խաղի եւ հանգստի վրա, լավ քնի եւ զբաղվի սպորտով: Մագնուսը ուրախ տղա է, շատ շփվող, սիրում է ֆուտբոլը, NBA-ի բասկետբոլը: Նա նախընտրում է բացօթյա եւ ջրային մարզաձեւերը, սիրում է լողալ օվկիանոսում: Ավագ խոհարարը նրան անհրաժեշտ է որպես խորհրդատու, որովհետեւ Մագնուսը սիրում է հնդկական, իտալական եւ չինական խոհանոցը: Հավաքներն Օմանում անցկացվում էին պայմանները Հնդկաստանին առավելագույնս մոտեցնելու նպատակով: Կարլսենը նաեւ սիրում է արեւն ու շոգը: Կարլսենը Նորվեգիայում գերաստղ է եւ բազմաթիվ երկրպագուներ ունի աշխարհի տարբեր երկրներում», – ասել է Ագդեստեյնը:
Աշոտ ՀԱԿՈԲՅԱՆ
