«Եվ սկանդալ կա, եւ շոու եւ հեղափոխություն եւ ներկա-բացակա: Այնպես ստացվեց, որ մարդիկ ստիպված են հայտարարել, թե ով ո՞վ է, ի՞նչ դիրքորոշում ունի»,- այսօր «Հայելի» ակումբում անդրադառնալով «Հայաստանի ցեղապաշտական» կուսակցության նախագահ Շանթ Հարությունյանի կողմից հայտարարված եւ իրագործված հեղափոխությանն`ասաց ԳԽ պատգամավոր, նախկին քաղբանտարկյալ Ազատ Արշակյանը:
Ի՞նչ անել եւ ո՞վ է մեղավոր` արդիական հարցերին բանախոսը պատասխանեց Չեռնիշեւսկու հայտնի խոսքերով. «Մենք արդեն գիտենք ի՞նչ անել եւ ո՞վ է մեղավոր»:
Ազատ Արշակյանի բնորոշմամբ`«Շանթը միշտ պատրաստ էր հեղափոխության եւ պարբերաբար դա անում էր, հիմա էլ փորձեց: Վաղուց կարելի էր դա անել: Հայաստանի անկախությունից հետո առաջին անգամ ազգային ազատագրական շարժում է սկսվում: Շանթը մի փոքր շտապեց, նյարդերից թույլ էր եւ այդ պատճառով էլ ես նրա կողքին չէի: Բայց, ազգային ազատագրական շարժում է սկսվում»:
Ինչ վերաբերվում է Շանթ Հարությունյանի ելույթներում այդ օրը հնչած արտահայտություններին եւ դրանց տոնայնությանը, նախկին քաղբանտարկյալն ասաց.«Խրամատում գտնվող մարտիկները չեն խոսում բանասիրական ֆակուլտետի լեզվով, այլ լեզվով են խոսում: Դեռ մեղմ էր: Եթե մարդը մենակ, իր անչափահաս երեխայի հետ դուրս էր եկել մի ամբողջ համակարգի դեմ, այդ կերպ էլ պետք է խոսեր»:
Կարդացեք նաև
Անդրադառնալով էլ այն մեկնաբանություններին, որ Շանթը պատվեր էր կատարում, Ազատ Արշակյանն ասաց, որ Շանթն իր պատվից դժվար թե ցածր համարեր որեւէ մեկի ծրագրին միանալը, բայց. «Շանթն ինքը ծրագրերի գեներատոր էր եւ ես չեմ կարծում, որ նրան որեւէ մեկը դրդել է: Իրադրությունն է դրդել` ՄՄ-ի ձեւով ՍՍՀՄ-ի վերականգնումը, Եվրոպային երկրորդ անդամ Հայաստանից վտարումը»: Արշակյանի համոզմամբ, եթե Շանթը Երեւանի կենտրոնը հայտարարում է խրամատ, այդտեղ այլ մեթոդ չկա էլ. «Դա կոնվենցիայից դուրս է»:
Նա կոնվենցիայից դուրս է համարում նաեւ մեր քաղաքական գործիչների վարքագիծը. «Առավոտյան եվրոպացի են, երեկոյան`եվրասիացի, առավոտը կիթառ են նվագում, երեկոյան՝ բալալայկա»:
Բանախոսի համոզմամբ, առաջիկայում բացի քաղաքացիական շարժումներից, մեր երկրում ազգային ազատագրական պայքարը մեծ տեղ կզբաղեցնի, կվերադառնանք ութսունականների վիճակին:
Նելլի ԳՐԻԳՈՐՅԱՆ
