Նոյեմբերի 6-ին Երևանի պետական բժշկական համալսարանում տեղի ունեցավ «Medicus 2013» 10-րդ հայաստանյան միջբուհական ինտելեկտուալ խաղերի առաջնությունը: Այն բաղկացած էր երեք խաղափուլերից` «Ի՞նչ, որտե՞ղ, ե՞րբ», «Բրեյն ռինգ», «Էրուդիտ կվարտետ»: Առաջնությանը մասնակցում էին մոտ 30 թիմ Հայաստանի հանրապետության բուհերից և ավագ դպրոցներից։
Առաջնությունը ուներ տարիքային սահմանափակում. նրան կարող էին մասնակցել մինչև 24 տարեկան երիտասարդները (1989 թվականի սեպտեմբերի 1-ին և ավելի ուշ ծնված երիտասարդները): Երևանի պետական բժշկական համալսարանի Ուսանողական խորհրդարանի անդամ Խաչատուր Մարգարյանը Aravot.am-ի հետ զրույցում բացատրեց այդ փաստը.
«Յուրաքանչյուր մրցույթ իր տարիքային սահմանափակումն ունի: Բնականաբար սերունդը փոխվում է, ավելի մեծ տարիքով մարդիկ այլևս չեն կարող մասնակցել նմանատիպ մրցաշարերի. հիմա գալիս է երիտասարդների ժամանակը: Երիտասարդներին ներգրավելը բավականին դժվար աշխատանք է, բայց միաժամանակ հնարավոր է»:
Առաջնության մասնակիցներից Լևոն Մինասյանը, որը հանդիսանում է Հայաստանի պետական տնտեսագիտական համալսարանի «Ինդեքս պրո» թիմի անդամ, Aravot.am-ի հետ զրույցում խոստովանեց, որ հարցերը սպասվածից բավականին հեշտ էին.
Կարդացեք նաև
«Մրցակցությունը թեժ է լինելու, որովհետև Բժշկականի թիմը միշտ կարողանում է լավ պայքարել ու Սլավոնական համալսարանի թիմն է շատ ուժեղ: Հիմնականում պայքարում ենք այդ երեք թիմերով»:
Առաջնությունը կազմակերպվել է Երևանի գիտակների ասոցիացիայի և Հայաստանի երիտասարդական հիմնադրամի աջակցությամբ: Նրա նպատակն է խթանել երիտասարդների ինքնազարգացումը, ինտելեկտուալ զարգացմանը և ապահովել «Ի՞նչ, որտե՞ղ, ե՞րբ» ակումբի բնականոն սերնդափոխությունը:
Ամի ՉԻՉԱԿՅԱՆ
