ՀՀ ոստիկանապետ Վլադիմիր Գասպարյանը նոյեմբերի 5– ի ուշ երեկոյան Ոստիկանության կենտրոնի բաժնում անձամբ բռնություն է կիրառել բերման ենթարկվածներ Շանթ Հարությունյանի եւ Վարդան Վարդանյանի նկատմամբ։ Այս մասին երեկ ԱԺ պատգամավոր Նիկոլ Փաշինյանին հայտնել են Հարությունյանն ու Վարդանյանը։ Փաշինյանը երեկ Երևանի ՁՊՎ-ում տեսակցել է նախօրեին Մաշտոցի պողոտայի իրադարձությունների արդյունքում ձերբակալվածներին։
– Պարոն Փաշինյան, տեղեկացանք, որ հանդիպել եք ձերբակալվածների հետ, ի՞նչ վիճակում են նրանք։
– Այո, այցելել եմ Ձերբակալվածների պահման վայր եւ հանդիպել եմ նոյեմբերի 5-ի միջադեպի կապակցությամբ ձերբակալված բոլոր 20 անձանց հետ։ Ձերբակալվածներից մի քանիսը առայժմ սնունդ չեն ընդունել, մտածում են հացադուլ հայտարարելու մասին, բայց դեռեւս վերջնական որոշում չեն կայացրել, այդ պատճառով անունները նպատակահարմար չեմ համարում հրապարակել։ Ձերբակալվածների մի մասը վնասվածքներ ուներ։
Շանթ Հարությունյանն ինձ տեղեկացրեց, որ Կենտրոնի բաժնում իր նկատմամբ բռնություն է գործադրել անձամբ ոստիկանության պետ Վլադիմիր Գասպարյանը, ինչպես նաեւ ոստիկանության պետի տեղակալ Հունան Պողոսյանը։
Կարդացեք նաև
Անձամբ ոստիկանության պետի կողմից բռնության ենթարկվելու մասին ինձ տեղեկատվություն փոխանցեց նաեւ ձերբակալված ազատամարտիկ Վարդան Վարդանյանը։ Նա ասաց, որ ոստիկանության պետը իրեն հարվածներ է հասցրել, իսկ ուրիշ ոստիկաններ պոկել են շքանշանակիրի կրծքանշանը։ Շանթ Հարությունյանը փոխանցեց, որ Հունան Պողոսյանը նաեւ Շանթի որդու հասցեին է սպառնալիքներ տեղացել, սեռական բնույթի հայհոյանքներ տվել։ Շանթն ասաց, որ այդ ընթացքում մի խումբ ոստիկաններ բռնած են եղել իր ձեռքերը։ Որպես պատգամավոր, կարծում եմ, որ այս հայտարարությունների կապակցությամբ պետք է պատշաճ քննություն իրականացվի։
– Իսկ ձերբակալածները պաշտպան ունե՞ն։
– Մի մասը ընդհանրապես հրաժարվել է պաշտպանից, մյուս մասին տրամադրվել է, առաջարկվել է հանրային պաշտպանի ծառայություն։ Ընդամենը մեկ կամ երկու հոգի էին, ովքեր ասացին, որ իրենց հարազատները զբաղվում են պաշտպան վարձելու հարցով։ Կարծում եմ սա մտահոգիչ փաստ է, եւ վստահ չեմ, որ այս պայմաններում ձերբակալվածները պատշաճ պաշտպանվելու հնարավորություն կունենան։
– Շանթ Հարությունյանն է՞լ է հրաժարվել պաշտպանից։
– Այո, ինքը չի ցանկանում պաշտպան ունենալ, բայց ես ասացի կարծում եմ, որ հնարավորության դեպքում արժե պաշտպան ունենալ։
Հոդվածն ամբողջությամբ կարող եք կարդալ «Հայկական ժամանակ» թերթի այսօրվա համարում
