Յարոսլավլի ազգային գեղեցկության 2013թ. մրցույթում հաղթող է դարձել Հայաստանը ներկայացնող Սվետլանա Խաչատրյանը: Հայտնում է «Յարոսլավսկի Ռեգիոն» պարբերականը:
Նոյեմբերի 4-ին Ազգային միաբանության օրն անցկացված մրցույթում մասնակցում էին 13 ազգերի ներկայացուցիչներ՝ գերմանացի, թաթար, հայ, լեզգի, ադրբեջանցի, բելառուս, ուկրաինացի, ռուս, չեչեն և ղրղզ: Հայաստանը ներկայացնում էին երեք հոգի:
Աղջիկները մասնակցել են մի քանի մրցութային փուլերի: Առաջին փուլում նրանք հակիրճ պատմել են իրենց մասին և խոսել, թե իրենց համար ինչ է նշանակում նոյեմբերի 4-ի տոնը: «Հացն է էականը» փուլում աղջիկները ժյուրիի անդամներին հյուրասիրել են տանը պատրաստած իրենց ազգային կարկանդակները: Ստեղծագործական փուլում, պարելով և երգելով, աղջիկները ցուցադրել են իրենց տաղանդը:
Ի վերջո, ժյուրիի որոշմամբ հաղթել է Հայաստանը ներկայացնող Սվետլանա Խաչատրյանը, իսկ հանդիսատեսի համակրանքի մրցանակին արժանացել է չեչեն աղջիկը:
Պատրաստեց Հովհաննես ԻՇԽԱՆՅԱՆԸ
