«Նախնյաց հետքերով» հասարակական կազմակերպությունը ոչ մի առնչություն չունի երեկ Մաշտոցի պողոտայում հեղափոխության փորձ կատարած Շանթ Հարությունյանի ակցիայի հետ:
Թեեւ այս կազմակերպության 3 անդամներ երեկ Մաշտոցի պողոտայից բերման են ենթարկվել, իսկ ավելի ուշ ձերբակալվել:
«Նախնյաց հետքերով» հասարակական կազմակերպությունը մշակութային կազմակերպություն է եւ քաղաքականությամբ չի զբաղվում:
Հ/կ անդամ Սայիդա Պողոսյանը Aravot.am-ին ասաց, որ «Նախնյաց հետքերով» հասարակական կազմակերպությունը մշակութային է եւ քաղաքականությամբ չի զբաղվում: Իրենց անդամները անցնելիս են եղել Մաշտոցի պողոտայով ու պարզապես հետեւել են ակցիային ու գործողություներին չեն մասնակցել: Անդամներից մեկին, Սայիդա Պողոսյանի խոսքով, բերման են ենթարկել պայթյուններից հետո, երբ իրավիճակը համեմատաբար խաղաղվել էր. «Երբ դեպքի հետ առնչվողներն արդեն բոլորը բերման են ենթարկված եղել: Այսինքն՝ ով առաջին գծում է կանգնած, ուրեմն պետք է ձերբակալե՞լ: Անարդար է, որ բերման ենթարկվածների մի մասին ազատ են արձակել, մի մասին` ոչ: Մենք փաստաբանների հետ ենք խորհրդակցում, շուտով մեր փաստաբաններն իրենց կարծիքը կարտահայտեն եւ կասեն` ինչ վարույթում է գործը գտնվում: Շանթ Հարությունյանն է պատասխանատու այս ամենի համար, այն բոլոր անդամների համար, որոնք հայտնվել են այդ վիճակում: Նա կարող է հեշտությամբ դուրս գալ, իսկ այս մարդիկ ինչի՞ կամ ո՞ւմ համար այնտեղ մնան»:
Արփինե ՍԻՄՈՆՅԱՆ
